Ххуллункьини, апрель зурул 1-нний, ЦIуминалийсса ЦIуссачIурттащиял шяраву байбивхьунни Дагъусттан Респуб­ликалул жяматийсса ва политикийсса ишккакку Сиражу­ттин Илиясовлул призру ласаврил цIанийсса «Лакку кIанттул кубок – 2017».

Футболданул кубокрал бяст-ччаллу байбихьлай бия ссят 12 хьусса чIумал. Амма ЦIуссачIурттащиял школалул хьхьичIсса майданнив кIюрххила бавтIун бия даврил сакиншинначитал ва тамашачитал. Шагьрурдая ва районная бувкIун бия республикалул къуллугъчитал, лакрал интеллигенция, цинявппагу спорт ххирами.

«Ла­кку кIанттул кубок» гьашину кIилчинни хъанахъисса. Цалчин ва бяст-ччал хьуссар 2016 шинал «Гъази-Гъумучи» тIисса ихIсандалул фондрал сипталий. Фондрал каялувчигу хъанахъи­ссар Дагъусттаннал ва лакрал патриот, Лакрал райондалул азарханалул хъунама хIакин, Дибирдул арс Дибиров АьвдурахIин. Му даврицIун кабакьу бувссар Лакрал, ЦIуссалакрал ва Ккуллал районнал бакIчитурал. Ларг­сса шиналсса кубокрай гьурттушинна дурссия 500-нния ливчу­сса спортсментурая сакин хьусса 40 командалул. «Лакку кIанттул кубок» республикалул оьрмулувусса агьамсса мероприятияну хьуссар ва мунин лавайсса кьимат бивщуссар республикалул агьалинал.
Ва турнир гьарица шинах дуллай аьдатравун дутансса пик­ри хьуну бур.
Сиражуттин Илиясов уттинингу жула республикалий цикссагу ххаллилсса давурттив дурсса инсан ур. Гьарцагу лакрацIун бавхIусса иширавугу ванал хъуннасса гьурттушинна дувай, чIарав ацIай. ДакIнийн бутанну, ванал сипталий, ванал кумаграцIухри итабавкьуну бивкIсса шаннагу лакрал райондалун хас бувсса ххаллилсса луттирду «Дагъусттан – гьантта-чIумул дагьанттувух» тIисса сериялул.
Кубок байбихьлахьи­сса кьинигу ЦIуссачIурттащиял шяравун хьхьичIва-хьхьичI бувкIминнавух бия Сиражуттин МахIаммадович ва ванал арсру.
Байбивхьуна футболданул кубок лакрал гимнрайну. Спортрал мажлис бачин бувну ия Дагъусттаннал Поэзиялул театр­данул директор Супиян Оьма­ров.
Мажлисрай ххуй-ххуйсса ихтилатру бунни Аьрасатнал ПаччахIлугърал Думалул депутат Аьвдулмажид МахIрамовлул, «Гъази-Гъумучи» фондрал председатель АьвдурахIин Дибировлул, Лакрал райондалул бакIчи Юсуп МахIаммадовлул, ДР-лул Футболданул федерациялул президент Будун Будуновлул, ОьрчIал ва мюрщи жагьилтурал спортрал школалул директор Александр Маркаровлул, ЛачIун буккаврил Олимпий чемпион Сайпуллагь Абсаидовлул.
Ттуплий буккаврил турнирданий гьуртту хьун бувкIсса цинявннахь барчаллагь тIутIисса ихтилат бувна мунил хъунма сававчи Сиражуттин Илиясовлул.
Лакрал кубок лахъа-хъун бан бувкIун бия СССР-данул, Европанал, Дунияллул ва Олимпий чемпионтал, МахIаммадхIасан Абушев, МахIаммадхан Арацилов, Ширвани Мурадов хIаласса спортрал чанна цIуртти. Нажагьсса шайхьунссар вайксса цIанихсса спортсментал гьур­тту хьусса турнирду.
Ва кубокрал цIанийсса бяст-ччалливух гьуртту хъанай дия Ккуллал, Лакрал ва ЦIуссалакрал районнаясса 36 команда. Финалданувун букканнинсса ва турнир нан тIий дур гьарица ххуллункьини, апрель зурул ахирданийннин. Финалданул матчру хьун тIий дур майрал цалчинсса гьантрай.
Финалданийн дурксса командарттансса призран кка­ккан дурну дур 350 азарда къуруш. Ххув хьусса командалун, арцуйнусса бахшиш дакъа­ссагу, булун тIий бур эмаратсса кубок. Ва кубокгу абадлий командалучIа личIантIиссар, агана му команда шамийла ххув хьурча.
А. Аьбдуллаева
И. Саидова