Апрель зурул 12-нний щалагу билаятрай кIицI лагай Авиациялул ва Космонавтикалул кьини. Байрандалул кьинилун хасну Совет Союзрал кIийла Виричу АхIмадхан Султаннул цIанийсса МахIачкъалаллал аэропортрал зузалт хьунабавкьунни Каспийк шагьрулул 8-мур лицейрал дуклаки оьрчIащал. Виричунал цIа дирзсса ва лицей аэропортрал аякьалийн лавсун цикссагу шинну ларгунни.
И. Саидова
Ва ххуллухгу байрандалул кьини аэропортрал зузалтрал 2-мур классрал дуклаки оьрчIру кьамул бунни «чIава ахмедхановцинал» кьюкьравун. Мукунна оьрчIан ккаккан дунни Виричунал оьрмулиясса ва къучагъшивурттаясса кино.
ОьрчIру барча буллай, миннахь насихIатрайсса ихтилатру бунни лицейрал директор Багьауттин Аьбдуллаевлул, «Аэропорт Махачкала» АО-лул профсоюзирттал комитетрал председатель Мансур Къимпаевлул, ва школалул выпускник, АхIмадхан Султаннул тухумраясса АбутIалиб Гандаевлул, 1999 шинал дяъвилул иширттаву гьуртту хьусса Насир Бурчакьовлул.
«Аэропорт Махачкала» АО-лул директор Арсен ПирмахIаммадовлул 8-мур лицейрал директорнахьхьун дуллунни Дагъусттаннал Авиациялул 90 шин шаврил юбилейран хас дурсса медаль.
Ахирданий мероприятиялий гьуртту хьуминнал тIутIив дирхьунни школалул хIаятравусса Виричунал гьайкалданучIа.
ОьрчIал багъравугу
Космонавтикалул кьинилун хасну школарттай ва оьрчIал багъирдаву кIицI лагай личIи-личIисса мероприятияртту, экскурсияртту, спортрал бяст-ччаллу. ЦIуссалакрал райондалийсса Чапаевкаллал шяравусса «Солнышко» тIисса оьрчIал багъравугу кIицI ларгунни Космонавтикалул байран.
ОьрчIахь космосрая ва космосравун левхсса космонавтътурая бусласисса «Ссавруннайнсса аьрххи» тIисса дарс дирхьуна музыкалул каялувчи АхIмадова Надирал ва физкультуралул инструктор Кьадирова Раял. Багърал тарбиячитуралгу дакIних бувккуна космонавтътурахасса шеърирду, увкуна балайрду.
Мюрщултрахь хьхьичIва-хьхьичI космосравун левхсса Юрий Гагариннуя, Совет Союзрал Виричу Муса Маннаровлуя бувчIинну бувсуна АхIмадова Надирал.
Гьаваллавун леххайни, космонавтътурал лаххайсса янналия ва миннал комосраву дукайсса дукиялия бувсуна Кьадирова Раял.
Багърал тарбиячитуралгу дакIних бувккуна космонавтътурахасса шеърирду, увкуна балайрду, дурна шадсса къавтIавуртту.
