Интнил байран Каспийскалий

Мартрал 21-нний Каспийскалий, Аьрасатнал халкьуннал аслийсса культуралул центрданий, хьунни Интнил байран – Навруз хьунадакьлакьисса батIаву. Муний гьуртту хьунни шагьрулул администрациялул, КIулшиву дулаврил управлениялул, культуралул идарарттал вакилтал, дуклаки оьрчIру.

Центрданул директор Башикар Вагьабовал хъамаллурахь бувсуна ва байрандалия, мунил мархрая, барча бувна бавтIми инт дучIаврищал, бувсуна Навруз-байран, ЦIусса шинал дайдихьу хIисаврай, кIицI лагайшиву Ираннай ва Афгъанис­ттаннай, паччахIлугърал байран хIисаврай тIурча – Таджикис­ттаннай, Узбакисттаннай, Къиргъисттаннай, Къазахъисттаннай, Туркманисттаннай, Азирбижаннай, Албаниянаву, Туркнаву, Индиянаву, Иракьнал Курдисттаннай, Македониянаву, мукунна Аьрасатнал кьиблалий – Татарсттаннай ва Башкирнаву.
Каспийскаллал шагьрулул администрациялул бакIчинал чулуха интнил байрандалущал бавтIми барча бувна мунал хъи­ривчу Людмила Левицкаял. Ванил оьвчаву дунни дуклаки оьрчIайн цалва миллатрал ва цайми-цайми миллатирттал культура, аьдатру, багьу-бизу лахьлан, миннул хъирив багьлан.
Гихуннай ОьрчIал творчествалул къатлуву тарбия хъанахъиминнал ккаккан дурна ярг­сса концерт. Мунивух гьуртту хьуна цIа дурксса музыкантъталгу: Сяид Дибиров (зюннав) ва ДР-лул лайкь хьусса артист Аьбдул МахIаммадов (дачIу). Цала къавтIавурттайну мажлис чIюлу бувна «Каспийлул жагьилшиву» ансамбльданул.
Ахирданий хьуна цинявннан аьмсса къавтIавуртту.