Лакку бава кIара буллай

АцIра — ацIния ххюра шинал хьхьичIра буттал шяраву, Цалчинмур ЦIувкIрав ларсъсса суратиртирттал архивраву ттун ляркъунни нажагьсса лахIзарду ккаккан буллалисса суратру. КIара буллалисса лахIзарду.

Циванни ми лахIзарду нажагьсса ? ХIакьину Лаккуй кIара буван кIулсса ва буван ччисса нажагьсса бакъа бакъанутIий. ТтукIрал ягу газрал пачливу шавхьсса ччатI канай вардиш хьуну бунутIий.
Бярал ва тIаннул цIарай кIири бувсса кIарттуву шавхьсса ччатI канай хъуни хьусса ттул никирал инсанталгу, буниялттунгу нахIусса ва чурххан дарувсса ччатIуя неъмат лавсъсса агьлу бунутIий.

Щалвагу махIлалийх ппив хьуну дикIайвакьай кIарттуву шахьлахьисса ччатIул кьанкь! ЧIаххуращал хIала- гьурттуну, ца кулпат кунма яхъанахъисса жу батIайссияв ччатI шахьлахьинал кIарттухун. Мугу дия жуву куннах- куннал ччаву цIакь дуллалисса аьдатрал низам. Бавахъал жун , мюрщиминнан кIарттуву гъурсса тIисса гургри дувайва.

Гургригу цIунисирахун канай, жу гъелисса кIарттух къумпI- къумпI бивкIун бикIайссияв, ххуйва- ххуйсса оьрчIру ва душру кунма. Кувний бавахъал кIарттувусса луххавун нувщигу бичайва жу рязий буван. ИчIува бухьурча, гьивчгу. Жун, оьрчIан, нувщи ва гьивч ххуйну шахьан бай аьмалгу лавхьхьуна махъату. Ттучаннай фольга бахлай къабикIайхьунссия таний, чяйлул къуршавусса цIай- цIайтIи чагъарду ябувайссия жу нувщи ягу гьивч бахIин. Бухсса кIункIур нувщущалва луххай- цIарай бивхьунугу шахьайссия. ЦIигьурнал гьунар кунная куннан лахьхьайссия. Буниялттунгу ца кулпат-я махIлалул оьрчIру! Гьай — гьай, чара бакъа хIала буххайссияв жу кIара баврил давривухгу.

Жулмур усттаршиврул бутIа бакъа шайхрав! Инттура аьраян дишайва бавахъал синааьрщи хъунисса аьмурдаву. Жу баргъ бивтсса, дарувсса кьинирдай запIатIи дурну ттархьру рищлай, аьрщи датлан бикIайссияв. Кувний жу чакмардавува аьрщи ккуччу дуллали бувайвав, ккупар ккуччу буллан къаччисса жун тай гьантрай ккупар давранну чIалан бикIайва.

Цан чирча, кьинибархан ккуччу тIун багьарчагума ккупар дачIи кьини бувну къуртал шайссия. КIара бансса аьрщи кьини лях тIиссакссагу ккуччу дуллан багьайва. Ахиргу, кIара буллалисса кьини дучIайхту, жу рахIатну ссихI бигьинтIиссия. Ххарил лехлай тамаша буллантIиссияв аьрщарая магьирну улттив дуллалисса хъаннил карунних. БювчIу бярду кунмасса гай улттая кIара буллай жун цимилгу ккавккссар. КIийла- шамийла цIу дирхьуну сасан бувайхту, ччатI шахьай кIара хIадурссар. Аьдатрай, цалчин бувщусса ччатIул кIарагу махIлалийх бачIайссия. КъакIулли суратирттай дакъасса , жулва наслулун ккаккантIиссарив ва личIантIиссарив кIара баврил усттаршиву. Бакъар сагъну хIакьину вай суратирттай ттул ниттищал Загьидатлущал кIара буллалисса , Цалчинмур ЦIувкIратусса Кьадинал Бадрижатгу. Пагьмурду чIявусса ттул ххирасса ниттиуссищар. Ялу- ялун чан хъаеай бур Лаккуй кIарттугу, кIарттаву ччатI буваймигу ва…хIатта букаймигу. Амма шагьрурдайцириннавунма ца караматсса гъелишиврул хIахI бутай кIарттул ччатIул цIа зумух ласайхтува. Бусанна ттизаманнай кIарттул ччатIул цувппа бивкIулуща ххассал бувссара тIисса душнил хаваргу. ЗахIматсса цIуцIаврил бас бувсса мунища шанма зуруй, Москавливсса азарханалий зат зумув дишин къахъанай, захIматну бивкIун бур. Ца ппурттуву мунин дяхьхьуниву, макIра кунма кIарттул ччатIул кьанкь рирщуну дур, гужну кIарттул ччатI букан ччан бивкIун бур. «Я нава бивчIантIиссара утти, я хъин хъанай бачинтIиссара» — пикри бувну бур душнил. Хъирив кьини муничIан азарханалийн бувкIун бур Москавлив яхъанахъисса шяравухалкь, кIарттул ччатIущал. Му кIарттул ччатIуя нюжмардий ца- ца хъис канай, душ ххуй хьуну, цайнма цуппа бувкIун бур. Укунсса тIилисин ва бияла бур кIарттул ччатIул!

ПатIимат Рамазанова