2016 шинал Дагъусттаннай ккаччал кьацI увкуну бивкIссар 4 азаллий 852 инсаннайн (2015 шинал 4812), миннавату 1 азаллий 832 иш хьуну бур 14 шин хьуннинсса оьрчIайн кьацI увкусса.

Яла-яла чIявуну кьацI увкуну бур Южно-Сухокумск, Къизлар, Къизилюрт, Дагестанские огни шагьрурдай, мукунма Къумтуркъалаллал, Ккуллал, Дарбантуллал ва Сергокъалаллал районнай.
ХIайвантрал инсаннайн кьацI учаврил масъалалул агьамшиву ляличIисса дур жиндрал шаврил азарданицIун бавхIуну.
Дагъусттаннай махъсса шиннардий жиндрал шаврил азардануцIун дархIусса тагьар чIуруннасса личIлай дур. Махъсса кIира шинал мутталий инсан жиндрал шаврил азарданул къашавай хьуну акъар.
Лабораториярттай дурсса хъиривлаявурттайну тасттикь хьуну бур жиндрал шаврил азарданул 12 хIайван къашавай хьуну бушиву (2015 шинал 4). Дарбантлив ва МахIачкъалалив, мукунма Бущихъиял, Дахадаевуллал, Дарбантуллал, Хайдакьуллал, Казбекуллал, Къарабудахкантуллал, Лаващиял, Сулайман-Сталлал ва Хасавюртуллал районнай.
Жиндрал шаврил азарданул хьхьичIалу кьюукьаву мурадрай ларгсса шинал Роспотребнадзорданул управлениялул гужлан дурну дур га азардануцIун дархIусса даву думиннайн жалгъалул (прививка) ххалаххив баврил ялув бацIаву. Му куццуй вакцинарду бувну бур 588 инсаннайн (пландалул 101,3%).
Дагъусттаннал Роспотребнадзорданул баян буллай бур. Агарда ккаччил кьацI учирча, щаву шюшин аьркинссар ссахIвандалул хьамагу дурну 15 минутIрал мутталий, яла щавулийн бутIин (шюшин) аьркинссар водородрал перекис. Муния махъ щавулул лагмасса ккарклийн щун бан аьркинссар ёд. Яла анаварну кьацI увкума иян уван аьркинссар травмпунктрайн хIакинначIан.

ХIасан Аьдилов