Дяъвилий жанну дуллуми дакIнийн бичлай

Апрель зурул 18-нний кьини Гъумук, Хъунмасса Буттал кIанттул цIанийсса дяъвилия зана къавхьуминнал гьайкалданучIа, хьунни Ххувшаврил 70 шин шаврин хас бувсса, аьдатравун багьсса «Аьпалул Вахта» тIитIлатIисса батIаву.

Муний гьуртту хьунни райондалул бакI дургьуми, шяраваллал бакIчитал, идарарттал хъуними ва зузалт, учительтал ва дуклаки оьрчIру.
Гьантлия гьантлийн ххялтIа дуклай дур дяъвилул цIаравух бувкминнал кьюкьа. Жущалва бумигу цIуллу-сагъшиврул цIакьну бакъашиврийн бувну, махъсса шиннардий Аьпалул вахтарду бан багьлай бур, цуксса хIайпнугу, цаягу ветеран гьуртту акъанува.
Дяъвилия зана къавхьуминнансса гьайкалданучIа тIутIал шалкка бивхьуна Юсуп МахIаммадовлул ва Афгъаннаву аьрали бурж биттур буллай ивкIсса ХIусман Маммаевлул.
«Аьпалул Вахта» тIитIлай, райондалул администрациялул ва депутатътурал цIания дяъвилул ветеранталгу, миккун бувкIмигу барча буллай, Юсуп МахIаммадовлул кIицI лавгуна Хъун дяъвилия зана къавхьуминнал аьпалунсса гьайкаллах райондалул администрациялул хъуннасса аякьа дуллай бушиву, ми гьарца шинал Ххувшаврил байрандалул хьунийн дакьин дайшиву, цIу дуккан дайшиву.
— Аьрасатлувтал хIадур хъанай бур жула билаятран яла ххирану дарцIумур ва яла пахрулун лайкьмур байран – Бюхттулсса Ххувшаврил кьини хьунадакьин. Ххувшаву ларсун 72 шин гьарчагу, никирая никирайн яла къагьантIиссар та дяъвилул къювугу, асардугу. Лакрал райондалий бакъахьунссар цавагу кулпат Хъун дяъвилул щавщи къабивсса. Жулла райондалия аьрайн лавгун бур ряхазарунния ливчусса чиваркI. ЧIивисса лакрал миллатрава ххюннал ларсун дур Виричунал цIа. ЧIявусса лайкь хьуну бур орден-медаллан. Хъиннува чIявур дяъвилул аьйплу бувми. Ххувшаву ласун хъунмасса кIану бувгьуссар, дяъвилул цIу къизгъинний талай бивкIминнал бакъа, захIматрал фронтрай гьурттушинна дурминналгу. Лув-ялув шамилва лайкь хьуссар ПаччахIлугърал комитетрал обороналул Занази ЯтIул Ттугълин ва му абадлий ливчIссар райондалучIа, — куна райондалул бакIчинал.
Дяъвилий жанну дуллуминнал рухIирдаяту алхIам бувккуна райондалул имам Щайхмурад ХIажимурадовлул.
Дуклаки оьрчIал дурккуна дяъвилул темалун хас дурсса назмурду. «Аьпалул Вахталун» хас дурсса митинг къуртал дуруна Дагъусттаннал ва Аьрасатнал Гимнру руцаврийну.