Дальнобойщиктурал тIалав дуллалимур къулагъасрайн ларсъссар ва мунил хIакъираву хIукмурдугу кьамул бувссар, — увкунни ДР-лул транспортрал, энергетикалул ва дахIаврил министрнал кIанайма Арслан Арслановлул пикетру дуллалиминнащалсса хьунабакьаврий.

Арслан Арслановлул ва министрнал хъиривчу Якьув Худжаевлул бувсунни ва масъалалул хIакъиравусса республикалул каялувчинал пикрилия: «Республикалул БакIчинангу, лалавсунни дальнобойщиктурал тIутIимур, тIалавшинну ва бартдиргьуну ду­ссар миннун хасну дурсса цаппара давуртту. «Платон» система дукьан дуван жуща къашайссар, амма ливчIми зул тIалавшиннал хIакъираву жу бан шаймур був­ссар, буллайгу буссару», — увкунни миннал.
СКФО-рал Ространснадзорданул МТУ-рал хъунаманал хъиривчу Муртазяли Муртазялиевлул бувсмунийн бувну, акциялул цалчинмур кьинива увкуну бивкIссар Да­гъусттаннал аьрщарайсса контрольданул пунктирдал хIакъиравусса тIалавшинну щаллу дантIишиву.
«Дунияллул халкьуннал дянивсса хъус духхаврил карточкарду дулавантIиссар 5 шинайсса. Транспортрал налог хIисавравун ласунтIиссар «Платон» системалий налогру дулайминнан­сса хIаллихшиннаву. Ялагу жущава бюхъаймуниву жу кумаг банну, хIала-гьурттуну зунну», — увкунни Муртазялиевлул.
«Законнал диктатура» тIисса ихтиярду дуруччайсса жяматийсса организациялул председатель Мухтар Ибрагьимовлул властьрал вакилтурал хьхьичIун лавсунни дальнобойщиктуран захIматну бацIлацIисса, таможнялий хъус ххал дайни паччахIлугърал контрольдануцIун бавхIусса масъалартту. Мунал бусаврийн бувну, личIи-личIисса кIанттурдайн баян бувну бунагу, гара тагьар личIлай дур, цукунчIавсса дахханашивур­тту къархьуну.
Министерствалул вакилтурал бувсунни циняв шикку гьаз був­сса масъалартту республикалул каялувчиначIа ххал бигьинтIий бушиву.