Апрельданул 9-нний МахIачкъалалив хьунни «Дагъусттан террорданийн къаршиссар» тIисса республикалул митинг. Ганий гьуртту хьунни Дагъусттаннал БакIчи Рамазан АьбдуллатIипов.Митинг хьуссар Санкт-Петербургуллал метролувусса терактрайну ливтIуминнал аьпалунсса, «ЦачIу террорданийн къаршину» тIисса, Аьрасатнал акциялул лагрулий. Республикалул митинграйн бувкIун бия азаллихъайсса инсантал.

Митинг тIиртIунни Дагъус­ттаннал Театрдал ишккаккултрал союзрал председатель Айгум Айгумовлул. «Так циняв ца хьуну жущава бюхъантIиссар террорчишивриясса нигьачIаврияр ххув хьун. Жува циняв цачIу – му гужри. Ва гужгу, цашивугу да­гъусттанлувтурал ккаккан дур­ссар 1999 шинал, жуйнма дунияллул халкьуннал террорчитал ххявхсса чIумал, жулла аьрщивгу, республикалул ва билаятрал конституциялул низамгу дурур­ччуну».
МинутIрайсса пахъ багьавугу дурну, махъру лавхъунни жяматийсса ва диннал идарарттал вакилтурал.
«Аьрасатнал ниттихъул» тIисса Щалвагу Аьрасатнал жяматийсса ккурандалул Дагъус_ттаннал отделениялул председатель Таисия МахIаммадовал увкунни: «Оьрмулуву зува ссаха зурчагу, зун даин дакIний бикIан аьркинссар зул хъирив Дагъусттаннал халкь бушиву, зу жулва ппухълуннал аьрщарай лявхъу­сса бушиву. Зулла давурттайну зу аьркинссар так жулла Ватан бюхттул дуллан, зулла тухумрал цIа гьаз дуллан».
Дагъусттаннал муфтийнал хъиривчу Идрис Асадуллаевлул увкусса куццуй, хIакьину дунияллий хъанай дур литIавуртту, терактру: «Инсантал литIавуртту, дяъвирду ва къалмакъаллу су­кку давуртту – хъунмасса бунагьри. Аллагьутааьланал Вакилнал (с.аь.в) агьалинайн оьвчаву дурну диркIссар бавкьуну яхъанай, исламрал рукьнарду буручлан, инсаннай жаза баврия инкар хьун. Жу, Дагъусттаннал бусурманнал, кьянкьану дащуй дихьлахьиссару инсантурай жаза бавуртту. Жу буру дакьаврихлу ва жулла Ватан тIутIайх дичаврихлу».
Митинграй махъ лавхъунни мукунма Оьруснал ххачпара­снал килисалул МахIачкъалаллал ва Грозналлал Епархиялул секретарь отец Иоаннул, Да­гъусттаннал халкьуннал шаэр Марина АхIмадовал, Олимпий тIуркIурдай арцул зава ларсма, лачIунукку МахIаммад Ибрагьимовлул ва цайминналгу.
Митинграй гьуртту хьунни ДР-лул Халкьуннал Мажлисрал Председатель Хизри Шихсаидов, ДР-лул БакIчинал ва ХIукуматрал Администрациялул каялувчи Исмяил Апанниев, ДР-лул ХIукуматрал вице-премьертал.