Апрельданул 3-нний «ТIиртIусса власть» проектрал лагрулий Да­гъусттаннал журналистътуращал хьунаавкьунни ДР-лул промышленностьрал ва машлул министр Юсуп Умавов.

ХIасан Аьдилов
Министрнал бусаврийн бувну, цIанасса ппурттуву республикалий зий бур базардал давурттал анализ дайсса комиссия. Га комиссиялуву бур ДР-лул МЧС-рал, МВД-лул, Ростехнадзорданул, Роспотребнадзорданул, УФНС-рал, ТIабиаьт дуру­ччаврил, Шяраваллил хозяйствалул ва бакIлахъиялул министерствар­ттал вакилтал.
Ва комиссиялул базардаву дуллан ккаккан дурсса давурттал ялув бацIаву дуллантIиссар, базардаву маша баврил давуртту низамрайн дуцинтIиссар. Циняв базарду законнал ххуллий зузи буллантIиссар. Цумур базаллуву цукунсса давур­тту дуллан аьркинссарив ккаккан дуллалисса сияхI дузал дурну дур гьарца базаллун хасну, тикку кка­ккан дурну дур ялун лирчусса цинярда диялдакъашивуртту ва ми цукун духлаган дан аьркинссаривгу, жаваб дулайма ва чIунгу.
Юсуп Умавовлул бусаврийн бувну, ва шинал дайдихьулий хьуну дур кIицI бувсса комиссиялул батIаву ва микку хъунмур ихтилатгу хьуну бур цIу дагьну диркIсса, цIарал ччувччусса базаллул диялдакъашивурттая. Тикку хъинну чIявусса бивкIун бур низам къадурурччусса кIанттурду, тамансса диялдакъашивуртту: цIу дагьавриясса нигьачIин къадурурччуну дикIаву, маша бай­сса ттучаннал ляхсса ххуллурдаву къабагьавай машачитал битаву ва цаймигу.
Министрнал бусаврийн бувну, 2016 шинал базардаву бувну бур 671 млрд. къурушрансса маша, дукIунияр 1,9 процентрал ххишаласса.
Промышленностьрал производствалул индекс ларгсса шинал хьуну дур 136,6%. Республикалий ларгсса шинал хъус дуккан дурну дур ва хIаллихшинну дурну дур 52 млрд. ва 400 млн. къурушрансса, ягу ганил хьхьичIмур шинах бурувгун 121 процентрал ххишаласса. ДукIу промышленностьрал предприятиярттай дузал бувну бур 311 цIусса зузи кIану. Машиностроениялул ва химиялул предприятиярттай дянивну лавсъсса харж ххи хьуну бур 14500 къурушрая 20636 къурушрайн биянцIа.
Министрнал бувсунни мукунма промышленностьрал предприятиярттал дукIу дуллусса налогирттал хIакъиравугу.