Апрельданул 4-нний цалла оьрмулул 90 шинал юбилей хьунадаркьунни цIанихсса аьлимчу, профессор, медициналул элмурдал доктор, Аьрасатнал Федерациялул элмулул лайкь хьу_сса ишккакку, Дагъусттан Республикалул халкьуннал хIакин, РАН-лул член-корреспондент, Асланнул арс Оьмаров Султан-Мурадлул.
Бадрижамал Аьлиева
Мурад Аслановичлун, Дагъусттан Республикалул БакIчи Рамазан АьбдуллатIиповлул хIукмулийн бувну, дуллунни республикалул награда – «Буттал аьрщарахсса ччаврихлу» тIисса лишан.
Му бусравсса награда юбилярнан дулун бувкIун бия Аьрасатнал Федерациялул Жяматийсса палаталул член Айгун МахIаммадов ва Лакрал райондалул бакIчи Юсуп МахIаммадов.
Лакрал райондалул чулухату Юсуп МахIаммадовлул «Лакрал райондалул хIурмат бусса гражданин» тIисса цIа дуллунни Султан-Мурад Аслановичлун, мукунна Лакрал райондалул гербрал лишангу ларчIунни хъазамрай. Бахшишран дуллунни Хан-Муртазааьлинсса гьайкалданул суратгу.
Жула лакрал ва Дагъусттаннал ххаллилсса арс, хьхьичIунсса аьлимчу Мурад Оьмаровлул оьрмулун хас дурсса гьарта-гьарзасса материал дикIантIиссар «Илчи» кказитрал хъиривсса цания ца номерданий.
