Цири жунма кIулсса хIанттия, бакIру авлия бувну, увччу айссар тIисса зат бакъасса?
* * *
Щавуйн лачIун дурсса лейкопластырь, цIун къахьунну, бигьану дизан дан шайссар, агарда ганил ялун аьракьи дутIирча.
* * *
ЧчаннацIасса ххуй дакъасса кьанкь гьан дайссар аьракьул, кIюрххи-кьуннил аьракьуй атил бувсса памма букларча чIанччаннайх, кIиссурттал дянийх.
* * *
Бишай яруннал линзарду марцI баншиврул ми лишин аьркинссар аьракьул кIунтIру бивчусса марцIсса аццух. ХIанттил бактериярттугу литIун байссар, пюрунгу цIай-цIайтIи бантIиссар.
* * *
Лажиндаравух буккияра аьракьуй атил бувсса памма, лажиндарал бурчу марцI хьунтIиссар.
* * *
Аьракьул кумаграйну гьан дан шайссар кьацIливасса кьанкьгу. КьацI вилагансса щин укун хIадур дайссар: 1 хъунна къуса гьавусса дарчиндалул хIала дайссар хIанттил бувцIусса ца стакандалуву: ларкьусса тIахIунттуву 2 нюжмардийгу диртун, яла дигьайссар. Гъилисса щинал бачIи стакандалувун дачIи чяйлул къуса вай хьюмушиврул дуртIуну, хIала дурну, кьацI вилаглан аьркинссар ккарччив шюршуну махъ. Явара, вай дюкьан къабучIиссар.
* * *
Ччурччусса щавуйн, чIун чIарах гьан къадиртун, хIан дутIирча, щавугу дюхлул дайссар, хьхьиничIалттугу хьун къабитайссар. ХьхьиничIали пIякь увкусса кIанттайнгу хIан дуртIуну хъинссар.
* * *
БакIрая чIачаран гьан баншиврул: хIанттил ца стакандалуву 2 чяйлул къуса гьавусса розмариндалул хIала дайссар, 2 гьантлийгу диртун, дигьайссар, гьарца бакI шюшлашийни, бакIрал бурчуй вайннуй массаж байссар (бакI шюшин 15 минутIрал хьхьичI).
* * *
ЦIуцIисса вичIилувун цаппара кIунтIру хIанттил бутIирча хъинссар. Цаппара минутIирттай бацIияра. ХIанттил, бактериярттугу литIун бувну, вичIилувусса къювугу лагь дантIиссар.
* * *
ХIанттил инсаннал чурххал кIиришиву лагь дайссар, так хIан чурххайх дуккарча. Хъинну лахъсса кIиришиву дусса чIумал хIанттий ттиликI ва хъазам ссуку бувну хъинссар. Спирт ссихIиран дизлай, чурх бяхълан бикIайссар, кIучIгу ан къабучIиссар.
* * *
КирпитIрайх паммалул хъис кай-кай бувну, хIанттийнгу щуну, буккияра мурччайх бивчусса курдайх (герпес), ччяни кьакьан дантIиссар.
ХIадур бувссар Тамара ХIажиевал
