МахIачкъалалив полициялул зузалтрал, ДР-лул Жагьилтурал иширттал министерстволул вакилтурал ва волонтертурал, «ОьрчIру чил къабикIайссар» цIанилусса рейд дурну, ашкара бу­нни къадагъа дирхьусса таммаку-няс бахлахисса машачитал.

А. Аьбдуллаева
Нясрал зарал буллай бур инсаннал лякьлун, ххюттукалун, нервардал системалун. Му сававну сукку хьун бюхъайссар къюкIлил ва туннурдал, мукунна урандалул азарду. Онкологтурал бусласимунийн бувну, кьацIливу урандалул азар сукку хьусса инсантурал 80% нярай ишла буллай бивкIсса бур.
Рейдрай буккан бувкIсса шагьрулул администрациялул ва жяматийсса организациярттал вакилтал, МВД-лул зузалт, студентътал бавтIун бия Советский райондалул полициялул отделданул хьхьичIун. Шикку, группардайх бавчIуну, гьарица группалуцIун участковыйталгу цIакь бувну, шагьрулул личIи-личIисса махIлардайн лавгунни, няс бахлахисса кIанттурду ашкара баву мурадрай. Наркотикру ишакаш баврил ялув бацIайсса управлениялул (УКОН) шагьрулул отделданул хъунама Оьмархаям Оьма­ровлул бусласимунийн бувну, няс бахлай бур гайва цавай инсантал, хIатта мудан жавабрайн буцлай, аькIри дихьлай бунува.
— Укунсса тIулдакъашиврух инсаннай кIиазарда къуруш аькI­лул дихьлай бур. Няс бавххуну дукIлакIимуних бурувгун, 2 азарда къуруш хъуннасса аьчIа дакъар. Уголов жаваблувшиндарайн тIурча, ми кIункIу бан хъанай ба­къар, няс наркотикран ккаллину бакъахьувкун. Амма инсантурал цанма бувчIин аьркинни муния цIуллу-сагъшиврун цуксса зарал биллай буссарив. Ва ишираву бан бюхълахъисса зат ца бур – асар хьунсса, хъунисса аькIри дишаву, — тIий ур Оь. Оьмаров.
Жагьилтурал иширттал министерстволул вакил Юсуп ХIусайнов буслай ур къадагъа дирхьусса таммаку бахлахаврия буруккинттарай бушиву республикалул агьали.
— Жу цимиллагу дюъ дишарду, бувчIин буварду вай бахлахиминнан, амма ми цукунчIав мютIи хъанай бакъар. Ччя-ччяни укун­сса рейдру дуллай, баххан къабитан хIарачат банну, — тIий ур Юсуп ХIусайнов.
Ва кьини цаппара ссятурдий дурсса рейдрай МахIачкъалалив ххал бунни няс бахлахисса 20 кIантту. Цинявппагу иширттал хIакъираву чивчунни протоколлу. Ми тIайла буккантIий бур мировой судирттайн, багьайсса хIукму кьамул бан.
Ва кьини укуннасса рейдру хьунни 10-нния ливчусса Да­гъусттаннал шагьрурдай ва районнай, «Баян бува чув бахлай буссарив ажал» тIисса наркотикирттайн къарши­сса акциялул лагрулий.