Апрельданул 6-нний Респуб­ликалул оь булай станциялий хъуннасса уттарашинна дия. Республикалул Муфтиятрал ва Дагкомрелигиялул сипталийну Санкт-Петербургливсса терактраву цIунцIияртту хьуминнан кумагран оь буллай бия Дагъусттаннал гуманитар институтрал,Дагъус­ттаннал исламрал университетрал, Гуманитар-педагогикалул колледжрал, Башларовлул цIанийсса медициналул колледж­рал студентътал.Акциялул лозунгру дия «Ислам – дакьаврил динни», «Инсантал литIлатIими – террористалли, бусурманнал кумаг­ри бай­сса», «Бусурманнал оь экьи къабутIайссарча, кумагран булай­ссар» тIисса.
П. Рамазанова
Сайки 350 студент гьуртту хьуну ур му акциялувух, гуманитар институтрал ректор Мурад Шяпиевлуя тIайла хьуну. Дагкомрелигиялул председатель МахIаммад АьбдурахIмановлул «Россия – 24» федерал каналданухьхьун дуллу­сса интервьюраву кIицI лавгунни, метролуву теракт дайхтува, гьанулун ласунсса хIучча бакъанува, «исламрал аьщух» луглай бивкIшиву, оь булаврил акциялийну аьрасатнал жяматран баян буван ччай бушиву терроризмалул исламращал цукунчIавсса дахIаву дакъашиву, бусурман диндалия цичIав къакIулсса инсантал мудангу исламрал дин оькки-ккаккул дуллай гьаз шайшиву, исламрал дин дувайми, мудангу терактру дащуй дихьлай, дакьаврил, нахIушиврул тарап дургьуми бушиву.