«Къачча ттун цамур классравун!»

Уттигъанну интернет дусса гьарнал итталун дагьхьунссар: «Миннатри, Тамара МахIмудовнай, на цамур классравун магьан бара, къа­чча ттун цамурклассравун!», — тIисса душнил видеоролик. Вана утти му душнийн оьвкуну бур Цалчинмур каналданийсса «Пусть говорят» тIисса Андрей Малаховлул передачалувух гьуртту хьун.

З. АьбдурахIманова
МахIачкъалаллал Кировский райондалийсса № 42 школалий дук­лакисса Мадина гьурттусса видеоролик социал сетирдай 2 миллион инсантурал ккарккун дур. Видеороликрай душ хъинну миннат буллай бур цила учительницахь: «Вания гихунмай ххуйну дукланна, так «ххюварду» бакъа къаласланна, уссурссу ва щала шагьру ххари бансса душ хьуннача, так ина на цамур классравун магьан бара»,- тIий.
Видеоролик ккарккун махъ, ца Мадина бакъасса, машгьур хьунни ванил учительница Тамара МахIмудовнагу. Учительницал бусаврийну, кIилчинмур четвертьрай ванил цила дуклаки душний дюъ дирхьуну диркIун дур, дарсирдал хIура бувккун тIий, шамулчинмур четвертьрай цахъи ххуйну дарс лахьхьин, цамур классравун тIайла букканна куну. Видеороликраягу ванин цичIав заралсса чIалай ба­къар. Мадина, роликрай кунма, лахъ-лахъну дарс бусайсса, хъинну хIала-гьурттусса душ бусса бур.
Видеоролик телефондалийн ларсун дур Мадинал ниттил Заирал. Мадина цуппагу бур Заирал цаппара шиннардил хьхьичI цила душ­­шиврий бивхьусса душ.
Кировский райондалул опекалул къуллугърал пишакартурал бусаврийну, 2009 шинал Орджоникидзел цIанийсса кучалий­сса ца къатлул халкьуннал оьвкуну бур, цал чIаххуврай хIантту хIачIлачIисса хъамитайпа бур цила оьрчIах цукунчIавсса аякьа къадуллай тIий. Вайннан багьну бур душ интернатрайн буцин. Ва цала оьрчI-душшиврий буцинсса, цанма битансса инсан уклай ивкIун акъар, цукIуй рязи хъанайгу ивкIун акъар. ОьрчI буцин бувкIсса Заира Исмяиловнахьгу ва душ мабуцара тIий маслихIат буллай бивкIун бур. Амма Заирал, щил ци учирчагу, душ бувцуну бур ва ттигу цалагу хIайп куну бакъар цилашиврий битаврий.
Мартрал байбихьулий Мадинайн ва ванил ниттийн оьвкуну бур «Пусть говорят» передачалий гьур­тту хьун. Утти, апрельданул 1-нний, «Автор жжет» тIисса цIанилу, Мадинагу гьурттусса «Пусть говорят» передача ккаккан дантIиссар.