Цала цIагу, цува лявхъусса кIанттул цIагу узданну ядуллалисса чув ур Москавлив яхъанахъисса, Хъусращиял шяраватусса АхIмадлул арс Билалов Камалуттин. ЗахIматрал ва къириятрал дарснугу хьуну бур ванан Ккуллал райондалул ххуллурдал участкалул хъунаману зузисса буттал, ва буттацIун хъар ларсун, арулва оьрчI ччаннай бацIан бувсса ниттил оьрмугу.
ПатIимат Рамазанова
Зунттал кIанай арулва оьрчI ччаннай бацIан бувсса кулпатраву Камалуттин шамилчинма ивкIун ур. Гьарманан ичIурагу, кьатIувгу дулланмургу чан къашайсса шяраву Камалуттин хъинну ххуйну дуклайгу ивкIун ур. Хаснува ва оьрус мазрал, литературалул ва тарихрал дарсирдал итххявхсса ивкIун ур, оьрус мазрал республикалул олимпиадарттай цимилагу хьхьичIунсса кIантту бувгьуну бур. Билаловхъал кулпат цуппава Хъусращиял шяраву ккаккиялунсса кулпатну бур.
Аьралий буржгу биттур бувну, Камалуттин Москавуллал Щалагу Союзрал юридический институтравун дуклан увххун ур. Ва институтрал студент хьуния мукьахсса оьрмугу Камалуттиннул МоскавуллацIун бавхIуну бур. Прописка дуваннагу захIматсса кIанттай, ванал, ччарча дуккинсса, ччарча, гилава-гила айивхьуну, ххуйсса къуллугърайн лахъансса хIарачат бувну бур. Ххуйсса кьиматирттай институтгу къуртал бувну, цаппара шиннардий юристну зий ивкIун ур. Яла Москавуллал къирагърай оьрчIру бигьалагайсса лагерь хIасул бувну, му лагерьданул директорну зий ивкIун ур. Камалуттиннул цIа мудангу диркIун дур оьрчIал лагерьдал хьхьичIунми директортуравух ца ххуттай. Цимилагу лайкь хьуну ур Москавуллал шагьрулул администрациялул ва кIулшиву дулаврил департаментрал чулухасса хIурматрал лишаннан ва Барчаллагьрал чагъардан. КуртIсса ва цIакьсса кIулшивуртту дусса ушивруцIун ванал канил бакъасса гьунаргу бакъар. Ппухълуннал кунна, ичIурасса ччимур даву усттарну дувайсса ур.
1980 шинал Камалуттиннул щарну бувцуну бур цала шяравудуш – НурмахIаммадхъал Анфиса. Буттал цIа дирзсса арс АхIмад ва душ Гулара хъуни бувну бур. Камалуттин ва Анфиса хъинну цаннацIун ца бавкьусса, цаннал хIурмат цаннал буллай оьрму бувтсса лас ва щар бур. Хъунмур оьрму Москавлив гьарчагу, вайннал узданну ядурну дур зунттал халкьуннал хъин-хъинсса хасиятру. Вайннал Домодедоволийсса ужагърай тачIавгу бухху-букку чан къашай. Хъамаллураха мудан хIурмат бикIай.
КIицI лаганну Билаловхъал Москавливсса агьлу мудангу цала бюхттулсса композитор, шяравучу Ширвани Чаллаев гьурттусса мероприятиярттайн лагайшиву, ДагъусттаннацIун бавхIусса цайми-цаймигу мажлисру лях гьан къабитайшиву. Ххуйсса гьурттушинна дувай вайннал Москавливсса Дагъусттаннал диаспоралул давривухгу. Камалуттин цува яхъанахъиссса Москавуллал шагьрулул, Аьрасатнал билаятрал патриот ур. Гьарца шинах Камалуттин чара бакъа ияйссар ватандалийн. Мудангу буруккинттай икIай Дагъусттаннай хъанахъисса иширттал хIакъираву.
Апрель зурул 4-нний Камалуттиннун 60 шин хьунтIиссар. ДакIнийхтуну барча дуллай буру ванал юбилей. ЦIуллушиву дулуннав тIий буру уттиния тинмайгу адаврай оьрму бутлангу, дуван дакIнийсса давурттив бартдигьлангу.
