Укунсса цIанилу мартрал 20-нний Ккуллал шяраваллил оьрчIал багъраву хьунни райондалийсса оьрчIал ряхвагу багърал тарбиячитурал дянивсса конкурс. Конкурсрал мурадну бия оьрчIал тарбиячинал касмулул сий гьаз даву, цалла давриву мунал ишла буллалисса кьяйдарду цаймигу тарбиячитуран кIул баву.

Конкурсрал жюри сакин бувну бия райондалул УО-лул пишакартурая ва конкурсраву гьуртту къахъанахъисса оьрчIал багъирдал тарбиячитурая.
Конкурс най дия кIира этап­рай: «Конкурсрал дарс дишаву», «Цаява цалва бусаву».
Жюрилул дурна укунсса жямру: 1-мур кIану буллуна АхIмадова Разиятлухьхьун, Ккуллал оьрчIал багъ; 2-мур кIану буллуна Оьмариева Жавагьихьхьун, Ккуллал оьрчIал багъ, ва Апанниева Магьиятлухьхьун, Ваччиял оьрчIал багъ; 3-мур кIану буллуна Щаллаева Амалияхьхьун, Хъусращиял оьрчIал багъ.
Ххув хьуминнан буллуна дип­ломру, бахшишру, луттирду.