ТIабиаьтрах ччаву дуну

Экологиялул шинал лагрулий баян бувну бур щалагу Аьрасатнал конкурс «Щюллисса планета». Ва конкурсрал кIанттул этап хьунни ттигъанну Лакрал райондалий. Конкурс хьунни бутIра-бутIрайх бавчIуну: КIундиннал школалий – ВицIхъиял махIлалийсса школардал дянив ва ШавкIуллал школалий – лагма щархъал школарттал дянив.

Райондалул кIулшиву дулаврил управлениялул каялувчи Явсупа ХIамзаевлул кIицI лавгунни конкурсрал мурад хъанахъишиву дуклаки оьрчIру тIабиаьтрах ччаву дуну тарбия баву, школарттай тIабиаьт дуруччаврин хас дурсса давурттив щурущи дуван багьлай бушиву.
Конкурсрал программалий бия тIабиаьтран хас бувсса балайрду, назмурду, сценкарду ва суратирттал выставка.
ВицIхъиял махIлалул школарттал дянив хьхьичIунсса ккаккияртту хьун дунни ГьунчIукьатIрал, КIундиннал ва Карашрал школарттал. ШавкIуллал махIлалийсса школарттал дянив хьхьичIунсса ккаккиярттащал бувккунни Хъурхърал, Хьурттал, Уриннал ва ШавкIуллал школар­тту. ХьхьичIунсса гьурттушинна дурсса дуклаки оьрчIан КIулшиву дулаврил управлениялул чулуха буллунни дипломру ва бахшишру.