Интнил кьини – Ккуллал райондалий

Мартрал 21-нний хъинну чIярусса тяхъашивурттайну хьунадаркьунни Интнил кьини Ккуллал райондалий. Ва кьини Ваччиял шяраву хьунни Интнил кьинилул байрандалун хас дур­сса тяхъашивуртту.

КIюрххила Ваччиял школалул спортзалдануву хьуна 8 команда бяст-ччаллий дурксса волейболданул турнир. Ва турнирданий гьур_тту хъанай дия: Хъусращиял, Ккуллал (кIира), ЧIяйннал, ЦIуйшиял Вихьуллал, Къяннал, Ссухъиящиял командартту. Волейболданул турнирданий тамаша буван бувкIун бия Ккуллал райондалул бакIчи Сулайманов Саэд, ванал хъиривчу Илиясова Сабрина, Дагъусттаннал БакIчинал зунттал районнайсса вакилнал хъиривчу СалихIов Аздар, райондалул идарарттал къуллугъчитал ва цаймигу.
Цалчинмур кIану бувгьуна Ккуллал 1-мур командалул, кIилчинмур – Хъусращиял командалул, шамилчинмур – Ссу­хъиящиял командалул.
Ганияр махъ, ахттая кIира ссят хьусса чIумал, гайми тяхъашивур­тту дайдирхьуна Ваччиял майданнивсса сахIналий. Шикку ккаккан дурна: жагьилтурал 32 кило ду­сса пут кIирагу каних гьаз даву, яла ххуйсса барта ккаккан даву, миллатирттал костюмру ккаккан даву, халкьуннал музыкалул инструментирттай руцаву, шяраваллан хасъсса дукия ккаккан даву.
СахIналул хьхьичI майданнив хьуна идарарттал командарттал архъан кIункIу даврил бяст-ччал. Шиккува хьуна райондалийсса 12-гу кIанттал сакиншиннардал бакIчитурал дянив чару личаврил бяст-ччалгу. СумбатIуллал шяраваллил лувату Ваччавсса майданнив бияннинсса лечаву дурна жагьилтурал. Циняв тяхъашивур­тту дувайхту, Ккуллал райондалул бакIчи Сулайманов Саэдлул ххув хьуминнан дуллуна грамотар­тту, кубокру ва арцущалсса конвертру.
Барча жулла Интнил байран!