Цаннияр ца аьнтIикIасса бартрая ябатIин хъанай бакъая. ТIюхчардал школалий Интнил хьхьунил байрандалуцIун бавхIуну баян бувну бия «Яла ххуймур барта» тIисса конкурс.
А. Аьбдуллаева
Хъунмасса барчаллагьри, учительтурал дуллалисса давривух чялишну хIала бувххун, Интнил хьхьунил байран лахъа-хъун дан хъунмасса захIмат бивхьуну бия нитти-буттал. ОьрчIал кIунттихьсса гьарца барталул буслай бия цуксса дакI дирхьуну дурну дуссарив гай. Бургъи-зурул лишандалия, жанавартрал къалипирдая байбивхьуну, шикку дакъасса журалул барта дакъая, цаннаяр ца ялтту буккан хIарачат бувну бия нитти-буттал.
Цала-цала бартригу дургьуну, «барта мяш, барта мяш» тIий, кьюкьа дурну школалул залданувун бувххуна дуклаки оьрчIру. НахIу-нацIу ххирасса оьрчIангу ва духьунссар яла чIа тIимур байран. Буттал буттахъая шихуннай нанисса жула байраннугу, аьдатругу ЦIуссалакрал щархъаву буниялагу лавайсса даражалий дуручлай бушиврул барашинна дунни ва кьинисса Интнил хьхьунил байрандалул. Бакъахьунссия шяраву цавагу кулпат байрандалий гъирарай гьурттушинна къадурсса.
Дуклаки оьрчIругу, щарнил жяматгу Интнил хьхьунил байрандалущал барча буллалисса, миннан тIайлабацIуртту чIа тIутIисса ихтилат бунни ТIюхчардал школалул директор ЩайхахIмад Дадаевлул. Байрандалул тарихрая бувсунни школалул учительница Бахчагуллул.
Хъирив оьрчIал дурккунни Интнил байрандалуцIун дархIусса дуаьртту:
Хъуру дюхъаннав,
ххарину дугьаннав,
Ссавнил лухччи дуччиннав,
Лухччинул халкь буччиннав,
Баргъ-гъарагъи дакьиннав!
Къатта къалмул буцIиннав,
Су ппиринжрал буцIиннав,
Ххану дикIул буцIиннав!
Къатри оьрчIал буцIиннав,
Къаайманан арс аннав,
Арсру бунан душ баннав!
Ницал кьуру бусса
оьл къахьуннав,
Оьлил кьуру бусса
ниц къахьуннав,
Хъу дюхъаннав, тта бюхъаннав,
Хъунасса Заннал
цIими бишиннав.
