Апрель зурул 12-нний бувну бур жул щалагу агьлу-авладран бишин-битан кIану бакъа ххира­сса ттул ссу, КIундиннал шяравасса Шагьимарданнул душ Дадаева Саламат.

КIундив 8 класс къуртал бувну махъ, МахIачкъалаллал шяраваллил хозяйствалул техникумгу бувккуну, чIярусса шиннардий зий бивкIссар КIундиннал колхозрал агрономну, цал — шяраву, яла — къутаннай. Саламатлул лас Шихаьлигу колхозрал председательнал хъиривчуну ивкIссар.
Вайннал къушлий тачIав бухху-букку чан къашайссия. Райондалия бувкIсса къуллугъчитал циняв вайннанния ликкайсса.
Шихаьлил ва Саламатлул, ххуйсса тарбиягу дуллуну, ччаннай бацIан бувну бур 8 оьрчI. Шяраваллил жяматрачIа, цинявппагу кIулссанначIа вайннал кулпатрал хIурмат хъунмасса бур.
Саламат цуппагу, оьрмулуву ккарксса захIматшивурттах къабурувгун, дакI аьчухсса, аьмал-хIал бавкьусса, инсаншиврул бутIа буллусса хъамитайпа бур.
Дяъвилия ппу зана къавхьуну, жу, шанма душ, ниттил канихун багьну ливчIун бияв. Хъунмур ссил Саламатлул хъунмасса захIмат бувссар ниттищал архIал жу ччаннай бацIан буллай, ппу акъашиву кIул хьун къабивтссар. Жун му тачIав хъама къабитан­ссар, лахъан къахьунссар.
Аьзизсса ссу Саламат! Цинявппагу гъан-маччанал цIания барча тIий бура вихь бувсса кьини. Уттиния тихунмайгу цIуллу-цIакьну, вила оьрчIащалгу, оьрчIал оьрчIащалгу битаннав оьрмулия щалихханнин. Вин лайкьсса, вихава лавхьхьусса махърувагу ляхълай бакъар, жул ххирасса ссу. СсалчIав буруккин къабагьаннав, цинявппагу дакIнийсса мурадру бартлаганнав, оьрчIая неъмат кка­кканнав.
Виха дуаьлийсса
ссу Гулихан

ДакIнийхтуну барча буллай буру жунма ххирасса, хIурмат бу­сса, Ваччиял шяраватусса Оьмарова Асмар Аьвдулкариннул душ оьрмулул 80 шин бартлаглагисса юбилейращал.

ЧIа тIий буру вин, Асмар, цIуллушиву, тIайлабацIу бусса оьрму.
Вила оьрчIал, оьрчIал оьрчIал ххари буллай, ичIувассаннащал архIал оьрму дакI ххарину бутансса каши дулуннав вихьхьун Аллагьнал.
Вил хIурмат бусса
Ваччиял жямат