Школалий ца яла ла­хъисса шамилчинмур мукьбутIул хъиривсса каникуллал гьантрай жула билаятрай кIицI лагайссар «ОьрчIансса луттирдал нюжмар».Цалчин­сса луттирдал нюжмар кIицI ларгун диркIссар оьрчIансса чичу Лев Кассиллул сипталий, Хъун дяъви нанисса 1943 шинал, оьрчIал чичултрал сакиншиндарай чIава буккулт тяхъа бансса мурадрай.

З. АьбдурахIманова
Ва тарихрацIунгу бавхIуну, МахIачкъалаллал ЦБС-рал 2-мур библиотекалул зузалт­ралгу личIи-личIисса цIардалу кIицI ларгунни оьрчIансса ва чIава жагьилтурансса луттирдал нюжмар. Нюжмар тIитIлатIисса цалчинмур кьини дурунни «Цалчинсса лу дунияллий ляхъаву» тIисса шадлугъ. Хъиривмур кьини, Экологиялул шингу духьувкун, дурунни «Луттиращал тIабиаьтрайн» тIисса шадлугъ.
Луттирал нюжмардул лагрулий библиотекалий вай гьантрай дурунни жура-журасса викторинарду, конкурсру. Библиотекалул луттирду буккаймур залдануву най дия «Ча дуркра, лу­ттирдал нюжмар!» , «Лу –ттул тIитIалар!», «Жула оьрчIшиврул ва жагьилшиврул луттирду!», «Лу – кьюлтIшинна, лу – ххазина!», « 2017 шинал чичулт-юбиляртал» тIисса ва цаймигу личIи-личIисса цIардалусса ккаккияртту.
Шикку зузисса пишакартурал мурадгу бур цала хIазсса шадлугъирттайну оьрчIавун лу ккалансса гъира бутаву, луттирахсса къулагъас ххи дуваву, луттирал кьимат гьаз баву. Библиотекалул зузалтрал цала насихIатрайсса ихтилатирттаву кIицI бувунни, хIакьинусса заманнай электрон журалий луттирду ккалаккаву сийлий духьурчагу, хIакьсса чагъарданул кьанкьгу дусса, канил бугьан тIааьнсса мужаллатгу дусса луттирачIан цавагу электрон лу къабияйшиву. ЧIа увкунни оьрчIан луттирдащал дусну цала-цала оьрмурдал ххуллийх бачаву ва, миннуйн дакъа, цайми «ххазинарттайн» иман къадишаву.