Лакку душнил ккаккияртту

Ванияр ца-кIива номерданул хьхьичI чивчуссия Москавлий «Дагъусттан» культуралул центрданий хьусса Жанна Кьурбановал вечердания. Уттигъанну тIурча, Москавлий Миллатирттал къатлувугу хьунни гьунар бусса балайчи ва художница, Дагъусттаннал искусствалул лайкь хьусса ишкка­кку Жанна Кьурбановал творчествалул мажлис.
Му хьунни Москавливсса «Дагъусттан» культуралул центрданул сипталийну.

Бадрижамал Аьлиева
БавтIминнал хьхьичI махъ лавхъунни «Дагъусттан» центрданул Президент Арсен ХIусайновлул. Ванал кIицI лавгунни Жаннал цIа Дагъусттаннай машгьурну душиву, Москавлив тIурча, му чIявучин кIулну бакъашиву ва мунияту пик­ригу хьушиву Жаннал гьунардая шихгу бусан, ккаккан дуван мунил усттарсса каруннил дурмур.
Вечерданий бунни ихтилатру Жаннал оьрмулул ва творчествалул ххуллурдацIун бавхIусса.
Концертрал программалувух гьуртту хьунни Башир Багьавдиновгу, ванал усттарну бивщусса агъач-къумузрал макьанная биялну нахIала бунни бавтIминнал. Тамашачитурал мукунма хъинну кьиматрай кьамул бунни «Зунттаяр лахъну» тIисса къавтIаврил ансамбльданул номердугу.
Ккаккиялун дирхьуну дия Жаннал дурсса давурттавасса цаппара.