Уттигъанну на Ваччав ахьтта ххуллийх най унува, чIарах нанисса чIиви машина ттул чIарав бавцIуна.

Яла га машиналул рульданухсса Вихьуллал шяраваллил бакIчи Сулайманов СайкIул чIарав щябивкIсса Вихьуллал шяраваллил школалул учительница МутIаллиева ПатIиматлул, ивзрав-урав куну махъ, ттухь тавакъю бувна: «Га жула «Илчи» кказитрал хъунама редактор Руслан Башаевлухь цала буттауссу МахIаммад Башаевлул луттирду итабакьа уча. Уттигъанну, ттула душнин аьркин хъанай, «Авххусса оьрчI» тIисса ганал лу чувчIав библиотекалуву лякъин къавхьунни», — куна. На ганихь бувсъссия бунияла ца-кIира шинал хьхьичI Руслан Башаевлул хIарачатрайну итабавкьушиву МахIаммад Башаевлул кьиссарду бивщусса хъинну ххуйсса ганзсса лу. ПатIиматлун гания хаварвагу бакъая. Миккува на мунихь бувсъссия нава Ккуллал шяраваллил библиотекалувун диян дуршиву Руслан Башаевлул, МахIаммад Башаевлул, ттула­ссаннул ва Амин Аьбдуллаевлул луттирдал ца далухIи. Мунияту Вихьуллал шяраваллил библиотекалул зузалтрангу аьркиншиву цачIава бакъасса луттирдал хъирив бизлан.
Нанияра утти ва иширал ялув пикри буваннуча. КIулсса куццуй, утти шаэртурал, чичултрал, журналистътурал, ялагу бюхъу бунал итабакьлай бур чIявусса луттирду. Амма, тIайланма учинну, ми лу­ттирду баххайсса ттучанну бувагу бакъар. Чичулт, шаэртал, журналистътал ми дахху-ласулул инсантал бакъархха, ми бур творчествалул инсантал. Итабавкьусса луттирду бур издательстварттал чивчуманахьхьун буллай – гонорарданун кIанай, инава ба­ххи тIий. Зат бакъая вай луттирду баххан булунсса ттучанвагу бивкIссания.
Мунияту, на шикку учин ччай ура, жула миллатрал бюхъу бусса, къуллугъирттайсса инсантурал, депутатътурал бучIияхха МахIачкъалалив жула лакрал чичултрал итабакьлакьисса луттирду баххайсса ца чIивисса ттучан тIитIин. Хайр бакъа къабикIантIисссар.
Лажин хIадур дурссар ХIажимурад ХIусайновлул