ЧIава пагьламантурачIа

ee_pho_15Дурусну гьашину 20 шин хъанай дур Ккуллал райондалий 1-мур ЦIувкIуллал шяраву Пагьламантурал школа тIивтIуну. Амма, ЦIувкIуллал шяраву пагьламан лахълан ччисса оьрчI-душру кIия-шама оьрчIайн багьайхту, пагьламантурал школа зун бивкIунни Ваччав. Шикку райондалул администрациялул къатрал ца корпусраву бур кIива спортзал.

Ва ца спортзалдануву зузи бунни пагьламантурал школа. Школалий каялувшиву дуллай ур ЦIувкIуллал шяравасса ХIажиев Рамазан.
— На чIивину унива аьдат хьуссара пагьламан лахълай. Мунияту ттуйн тапшур дурна школалий каялувшиву дуллан. Цакьнива ттул цамагу кумагчи икIайссия. whosjАмма, жунма кIулсса куццуй, экономикалул ишру багьана хъанай, утти навалу ура оьрчIан пагьламан лахъан лахьхьин дуллай. Жул ЦIувкIуллал шяраву пагьламан лахълахъисса оьрчIру увагу шама ливчIун ия. Мунияту, шиккун, Ваччав бизан бувссар школа. ЦIана школалийн занай бур 15 оьрчI-душ, — буслай ур Рамазан.
Бунияла, мюрщисса душру, оьрчIру бия муксса сивсуну, зирангну ххалуйх лахълай. Ши­ккува спортзалданул бачIиннуй бур лачIун буккултрал матругу. На школалийн лавгсса кьини ги­кку бия: ХIажиева ПатIима, Рамазанов Арсен, Рамазанова Марианна, МахIаммадова Аьйша, Калантарова Мисиду, Раджабов Заур, Загьидиева Зайнаб, Загьидиев Залимхан. ДакIний дитияра вай цIарду. Аьлтта чIалай бия вайннавусса гьунарду ва ялун личинтIишиву.