Дагъусттаннал миллатирттал инициатив группалул республикалул хъунама Рамазан АьбдуллатIиповлул цIаний чагъар гьан бунни уссурвал Хачилаевхъал аьпалун гай ялапар хъанай бивкIсса Котрова кIичIираваллин цIа дизан тавакъю буллалисса. Му чагъар «Ккавкказнал узелданийн» буллунни Дакьаву дуруччаврил комитет­рал Дагъусттаннал отделениялул хъунама Жабраил Хачилаевлул.
«Хачилаевхъал гъан-маччами ва лакрал миллат хъунмасса барчаллагьрай бикIанссия, агана му масъала щаллу барча», — тIий бур чагъарданий.
Уссурвал Хачилаевхъан багьайсса кьимат бивщуну, му тавакъю бартбигьинссар тIисса умудгу бур.
МахIаммад Хачилаев лачIун уккаврил спортрал мас­тер ивкIссар, шамила каратэлул чемпион хьуссар, кIийла СССР-данул каратэлул кубок лавсъссар. 1992 шиная шинай «Гъази-Гъумучи» Дастталугърал хъунаману увчIуну ивкIссар. МахIаммад хъунмасса хIаллай зий ивкIссар Дагъусттаннал Дакьаву дуруччаврил комитетрал хъунаманугу.
Надиршагьлул Москавлив Литературалул институт къуртал бувссар, чивчуссар поэзиялул ва прозалул луттирду. 1980 шинал Ленинградрахлу чемпионатрай гьуртту хьуссар, каратэлул лухIи мухIлу ларсъссар. 1996 шинал Александр Лебедьлущал Чачаннавун лавгун, дяъви бацIан бан кумаг бувссар. Мура шинал ганая Госдумалул депутат хьуссар.
Мичиххичнал аьрщарай ширишилун бувгьусса Дагъусттаннал ва Аьрасатнал халкь ххассал буллай, биялсса захIмат був­ссар МахIаммадлул ва Надирдул.