КIира шин хьуну дур Москавлив лакрал жагьилтурал ккуран сакин дурну. Мивун бухлай бур Москавлив бугу-бувну, хъуни хьусса, Дагъусттанная дуклан ягу зун лавгсса оьрчIру-душру. Ми гьарца алхIаткьини цачIун батIлай бур. Лакку маз лахьхьин ччиминнан тIивтIуну бур хасъсса курсру. Дарсру дихьлай бур Лаккуй хъунма хьусса Нурдуева Айманат.

Зулайхат Тахакьаева
Москавлив аьрххи багьну бунува, нагу лавгссияв ккурандалущал кIул хьун. Хьунабакьаврийн увкIуна профессор, Москавливсса «Дагъусттан» культуралул центрданул хъунама Арсен ХIусайнов ва отставкалийсса полковник Аббас Аьлишаев.
Арсен ХIусайновлул бувсуна центрдания, мунил хьхьчI бихьлахьисса мурадирттая ва чялишсса уртакьтурая. Жагьилтурангу маслихIат бунни уртакьну зун. Нагу бувсъссия «Илчи» кказитрая. Цуксса хIайпнугу, чан­сса бакъая лакрал кказит бушиврия хавар бакъасса. Амма хъинну гъирарай цIухлай бия кказит­рал даврия, зузалтрая ва миллат­рал иширттацIун бавхIусса цаймигу масъаларттая. Икьрал дарду гихунмай уртакьну зун.
Гьарцаннал бувсуна цая-цаятува. Цавай бур билаятрал хьхьичIунсса дуккаврил идарарттаву ккалаккисса, цавай, Дагъусттаннай кIулшиву ларсун, тих пишакаршиву ларай дуллалисса, цавайгу бур, дуккавугу къуртал дурну, ххуй-ххуйсса пишардай зузисса. Вайнная гьарцанная жу бусанну хIалли-хIаллих гихунмайсса номердай.