Март зурул 19-нний Поклон зунттуй, Хъунмасса Буттал кIанттул цIанийсса дяъвилул музей бусса кIанттурдай, хьунни Совет Союзрал Виричу, Ухссавнил Флотрал щинал вих буххай жамирдал дивизиондалул командир МахIаммад ХIажиев увну 110 шин шаврин хас дурсса шадлугърал мероприятие.

Ванил сакиншинначитал хьунни Аьрасатнал ПрезидентначIасса Дагъусттаннал муданмасса вакилхана, «Морское братство – нерушимо» тIисса дуниялул халкьуннал дянивсса жяматийсса организация, МахIаммад ХIажиевлул фонд. Шикку гьуртту хьунни Да­гъусттаннал Постпредствалул вакилтал, Беларуснал посольство, флотрал адмиралтал, щинал вих буххай жамирдал командиртал, Москавуллал ва Дагъусттаннал хьхьирил училищардал кадетътал, Ух­ссавнил Ккавкказуллал регионнал, цIанихсса Можайск, Волоколамск, Подольск шагьрурдал вакилтал, Москавуллал ВУЗ-ирдал студентътал. Бусравсса хъамаллуравух бия Аьрасатнал Виричунал цIа ларсъсса ДибирхIажи МахIаммадов, Евгений Черняев, Сергей Шейко, мукунма Социалист ЗахIматрал Виричу Алексей Левин.
Шадлугърал мажлис байбивхьунни Абадул цIарачIа тIутIив дишаврия. Шикку гьуртту хьунни Дагъусттаннаясса хъунмасса делегациягу. Дагъусттаннал БакIчи Рамазан АьбдуллатIиповлул чулуха­сса тIутIал шалкка Абадул цIарачIа бивхьунни Дагъусттаннал постпред Изумруд МухIуттиновал ва 1-мур ранграл капитан Усман-хIажи Аьлиев­лул.
Мажлис бачин бувсса «Морское братство – нерушимо!» суккушиндарал каялувчи Арсений Крицкийл баян бунни вирттал – подводниктурал аьпалун минутIрайсса пахъ багьаву.
Хъунмасса Буттал кIанттул цIанийсса дяъвилул музейрал залданувун бувххун махъ музейрал директорнал хъиривчу Михаил Михальчевлул барча бунни щинал вих буххай моряктал байрандалущал, бувсунни цува хIадуршиву билаятрал цIа дунияллийх машгьур дур­сса вирттаврал цIарду абад дансса давурттив дуллан.
Дагъусттаннал БакIчи Рамазан АьбдуллатIиповлул цIаниясса барча баву дурккунни Изумруд МухIуттиновал.
Хъирив Аьрасатнал хьхьирил аьралуннал ветерантуран наградартту дуллунни. Байран чIюлу дунни творчествалул коллективир­ттал ва кадетътурал балайрдал ва къавтIавурттал. «Аьдат» тIисса халкьуннал къавтIаврил ансамбльданул цинявннавун гьавас бувтунни.
ХIажиевхъал кулпатрал цIания ва мероприятиялул сакиншинначитурахь ва гьуртту хьун бувкIминнахь барчаллагь увкунни М. ХIажиевлул уссил арс Муртазааьли ХIажиевлул. Официал бутIа къуртал хьуну махъ ккаккан дунни ххаллилсса концерт.