Хъугьулун хъинну хъинсса дур мархха-ххатин. Вайннул гьут­рурду марцI байссар, хъугьу куклу байссар. Агарда ва чIумал канарча так ахънилсса ва ккурчру (накIлил ва дикIул дукия хIала къадурну), хъугьу ччяни гьантIиссар.

КIяла жавж
ва дарчин

— Хъугьулун бакьайссар мукунма кIяла жавжирал (имбирданул) порошокгу, дарчингу (корица), михакгу (гвоздика).
— Чяйлул чIири къуса кIяла жавжирал порошокрал, къеп дарчиндалул ва михакрал лавсун, ялун бутIайссар ца стакан щаращисса щинал, 10 минутIрайссагу диртун, ххув тIий, хIачIайссар. Ччарча, ялув чансса ницIгу дишин бучIиссар, так гай дяркъуну мукьах.
— Дарчин чIярусса цIу­цIавурттан дарувссар: аьвкъу-гъили хьуни, диабетран, хъун ххюттун. БучIиссар урттул чяйлийн дарчиндалул къеп бивчуну хIачIан ягу, кьацIливун бивчуну, мукунма цIупIа тIий, чIемпи дюкьлан.
— КIинттул бучIиссар лимондалул, апельсиндалул ккир­ттая, кIяла жавж, ницI, дарчингу (чIи­ри къуса) дирчуну, чяй дурну (ца стакан) хIачIан. Ххуйну гъилигу антIиссар, дахьра дайдихьлахьисса аьвкъу-гъили шавугу дацIан дантIиссар.
Куркума
— СсихIирал ххуллун, гьутрурдан яла хъинмур дусса дур куркума. Шиву буссар куркумин. Ванил бактериярду гьарза хьун къабитайсса бур. Мунияту аьвкъу-гъили хьусса чIумал куркума гьарзану канан аьркинссар. Куркума къадюххай­ссар, цIуму гьалак буккан къабай­ссар, мунияту куркума гьарнан дакьайссар.
Яла бигьамур вариантгу дур, гъилисса щинал стакандалувун ца чяйлул къуса куркумалул дирчуну, ххуйну хIалагу дурну, ххув тIий хIачIлачIаву.
БучIиссар, кIирисса тавалувун къеп куркумалул бивчуну, гайннул кьункьайн ссунтIа тIунгу.
Чяйлул чIири къуса порошокрал кьацIливун бивчуну, цIупIа тIий, чIемпи дюкьлангу бучIиссар, укун ккарччан ва синттангу хъинссар, куркумалул кариес дайсса бактериярду литIайссар.