Вай гьантрай, мартрал 4-нний, «ТIиртIусса власть» проектрал лагрулий, хъуншагьрулул администрациялий хьунни халкь кьамул буллалисса кьини.

КIюрххил ссят 11-нния байбивхьуну, ахттакьун бизаннин, шагьрулул хъунаманачIан ва мунал хъиривчутурачIан цала-цала къайгъурдащал 50-кссаинсан увххун ур. Халкьуннаясса хъунмурчIинсса аьрзарду бия кIичIирттаву оьрчIансса, халкь щябикIансса, сайр бан­сса кIанттурду бувара, цIинцI-ччюрк дичайсса кIанттурду бакьин бувну, низамрайн буцин аьркинни тIисса.
МахIачкъалаллал бакIчина­чIан увкIсса Аскандар МахIам­мадовлул, Тимур Саркаровлул ва Тимур Мажидовлул тавакъю бур шагьрулул кIичIирттаву «Яндекс. Транспорт» тIисса система ишла дан маслихIат бу­ллалисса . Ванил кумаграйну автобусирттал, троллейбусир­ттал даврил ялув бацIан бюхъан тIий бусса бур. Ва къуллугъраща бюхъантIиссар ГЛОНАСС/GPS системалул кумаграйну транспортрал даврил даража лахъ бан. Карталий чIалантIиссар автобус ягу троллейбус дагьай­сса чIумуяр ххишалану чув лахъи лаглай бурив, халкь циван хъунмасса хIаллай ялугьлагьи буллай бурив кIул буван. «Яндекс» компаниялун хъуни шагьрурдащал зун бигьану бунугу, Аскандар МахIаммадовлул бусаврийну, вайннал вакилтал рязий хьуну бур жула хъуншагьрулийгу байбишин ва давриха зун. Шагьрулул бакIчинал, миннахь барчаллагьгу куну, тапшур бувну бур цала каялувшиндаралусса къуллугъчитурахь ччясса мутталий ДР-лул Минтрансращал ва суалданул хъирив буккан.
Мукунма шагьрулул бакI­чиначIан бувкIун бур «Радиотовары» тIисса микрорайондалул халкь, цал къатрал чIаравсса аьрщи цачIату зехлай бур тIисса аьрзиращал. Гиккува га аьрщи зерххусса инсан судрахьхьун уллуну ур ва гана­хьхьун буллуну бивкIсса кадастр­данул номер къатIайласса бивкIшиву чIалачIи бувну бур. Мукунма шиккун бувкIун бур МахIачкъалаллал №42 школалучIасса дачIрасса аьрщарай сквер буван къабу­чIиссарив тIисса аьрзалущал­сса халкьгу. Муса Мусаевлул махъ буллуну бур, хъирив лавну, вайннал мурадгу щаллу бансса чаранну лякъин.