Дагъусттаннай чансса бакъар цайминнал оьрмурду ххассал буллай жанну дуллусса вирттал. ХIайп, чIявумур чIумал миннал виричушиврун лайкьсса кьимат къабивщунува личIай. Мукунминнавасса ур жагьилсса кулпат террористураща ххассал буллай жан дуллусса, Курахуллал райондалийсса Икра шяравасса, Батманов Зайнуттин.

Ва иш хьуну бур 2015 шинал май зурул 15-нний, Зайнуттин вацIлуву жагьилсса хIавив бувгьусса кIанттурдал лагма уклай ивкIун ур. Ванан бавну бур аьтIутIисса вилттили оьрчIал чIу. МаркIачIан чIумал вацIлуву вилттили оьрчI ци дуллалиссар тIий, Зайнуттин аьтIутIисса чIунийн авчуну ур. Ца-кIира метралул манзилданий ванан ххал хьуну бур ярагъуннищалсса, камуфляж янналувусса ряха адаминагу, миннал хьхьичI никирттайн багьсса жагьилсса оьрчI ва душгу. Миннал чIарав щяв бивкIун бур аьтIутIисса вилттили оьрчIгу. Иш-тагьар чIалан дикIайхту, Зайнуттиннул, гъан хьуну, тавакъю бувну бур боевиктурахь жагьилсса кулпат итабакьияра, миннан кIанай цува ширишилун увгьуну куну. Террористурал итабавкьуну бур ми. Лас ва щар Ругун тIисса шяраваллил чулухунмай лавгун бур. Зайнуттин тIурча, боевиктурал цащала увцуну ур. Къачагътурал кьюкьлул бакIчи ХIасан Аьбдуллаев (ванал ялун цIа дур Абу Ясир, бат увссар 2016 шинал Кьиб­лалул Дагъусттаннай террористурайн къаршисса операция нанисса чIумал) цIухлан ивкIун ур Зайну­ттиннухь чак буварав тIий. Ваналгу бувсун бур цала чакгу байшиву, хIажлийн Маккаливгу лавгшиву. Яла боевиктал Зайнуттиннухь цала чул бугьи, цанма ка-кумаг буллалу тIун бивкIун бур, Зайнуттин рязи къавхьуну ур. «На мукунсса кьадаршиву тачIав къадувантIиссар», — увкуну бур ванал.
Зайнуттиннул телефон ххал дуллалийни, боевиктурал бакIчинан хIисав хьуну бур Курахуллал райондалул полициялул хъунаманал номер.
— ВацIлуву инсаннал жаназа дурча, нарядращал ухьхьу куну оьвчи полициялул хъунаманайн, — тIун ивкIун ур къачагътурал бакIчи Зай­нуттиннухь.
Къачагътал полициялул зузалт­ран луркIан дуккан ччай бивкIун бур, амма вайннал мурад барткъалавгун бур. Зайнуттиннул кьянкьану жаваб дуллуну дур: «ИвчIан ацIанна, му лавмартшиву къаданна», — куну.
Вай хьуну бур Зайнуттин Батмановлул махъва-махъсса махъру. Цала тIутIимур къабувкун, боевиктал зулму буллан бивкIун бур Зайнуттиннуй. Амма къучагъсса Зайнуттин мютIи ан къавхьуну ур. Яла къачагътурал му къинттуллухун бивтун увтун ур.
Вай гьарзат чIун ларгун махъ кIул хьуну бур. Ларгсса шинал Москавлив хоккейрал дунияллул чемпионат нанисса чIумал теракт дан хIадур хъанай ивкIшиврий щак тIий увгьуну ур дагъусттанчу Нариман Баширов. Махъ кIул хьуну бур му ХIасан Аьбдуллаев бакIчисса кьюкьлувасса ивкIшиву. БакIчинал амру бувну, мунал оьрмулуцIа увну ур цичIав тахсир бакъасса Зайнуттин Батманов. Нариманнул бувсун бур ихтиярду дуруччай органнаk зузалт­рахь гьарзат хьусса куц.
Н. Башировлул бусласимунийн бувну, Зайнуттин Батмановлулгу Аьрасатнал Виричунал цIа ларсъсса цаймигу къучагъсса дагъусттанлувтурал куннасса виричушиву дурну дур. Интернетраву дур Зайнуттин оьрмулуцIа увсса ва Н. Башировлул му иширая бусласисса видеороликру. Ми интернетравун къадагьссания, Батмановлул виричушиврия къакIулнува личIанссия. Ши­ккува кIицI лаган, Зайнуттин Батманов хъанай ур цIанихсса Ккав­кказуллал абрек Киро Бубал, Совет Союзрал Виричу Эсед СалихIовлул, генерал-майор МухIуттин Кахримановлул шяравучу.
Лазгиял миллатрал ва культуралул автономиялул президент, Аьра­сатнал ПрезидентначIасса Миллатирттал арардал Советрал член Аьрип Каримов увккун ур Аьрасатнал Президент Владимир Путиннуйн ва Дагъусттаннал БакIчи Рамазан АьбдуллатIиповлуйн Зайнуттин Батмановлун, аьпалул хьуну махъ, паччахIлугърал награда дулара тIисса сипталущал.
Сулайман Стальскийл цIанийсса райондалул кIул­шивуртту дулаврил зузалтрал профсоюзрал комитетрал председатель Халилбаг Халилбаговлул интернетраву дирхьуну дур Аьра­сатнал Президент В. Путиннухь Зайнуттин Батмановлун аьпалул хьуну махъ Аьрасатнал Виричунал цIа дулаву тавакъю буллали­сса петиция. Микку къулбасру дурну дур азарахъул инсантурал. Зайнуттин Батманов кIулми циняв­ппагу бур му дакI хъинсса, аьчухсса, захIмат ххирасса ивкIшиву буслай.
Зайнуттиннул ппу Лукьман Батманов Хъунмасса Буттал кIанттул цIанийсса дяъвилул участник ивкIун ур, Зайнуттиннуягу буттан лайкьсса арс увккун ур. Совет Аьра­луннаву къуллугъ буллалисса чIумал ва лайкь хьуну ивкIун ур «За отличие в воинской службе» II даражалул медальданун. Зайнуттиннуk оьрмулун 48 шин диркIун дур. Щащар хьусса ванал кулпат хIакьину 4 оьрчI тарбия буллай бур. УрчIцIалла шин хьу­сса ванал нину Султанханум вих хьун ччай бакъар цила аьзизсса арс акъа­шиврийн.
ЧIявусса оьрчIру бусса Батмановхъал кулпатран хIуку­матрал кумаг аьркинну бур.
Зайнуттин Батмановлул буниялагу хъуннасса чувшиву дурссар. Гьарнаща къашайссар цаманал цIаний жан дулун.
Цала къучагъшиврийну Зайнуттиннул тасттикь бунни Аьра­сат вирттаврал билаят бушиву. Умуд бур билаятралгу, республикалулгу хъуниминнал мунал къучагъшиврун лайкьсса кьимат бищуншиврийн.
МахIаммад Ибрагьимов
ХIадур бувссар
А. Аьбдуллаевал