Кьини дуркнал чIарав бацIансса яхI-къирият

photof_10Ва нюжмардий жул редакциялийн увкIунни Лакрал райондалийсса ЧIарттал шяравасса хъуначу – МахIаммадов Мухтар МахIаммадлул арс. Ванал кказитрал редакциялийнсса аьрххилул мурадгу уттигъанну цала ужагърай хьусса бала-апатIраву цала чIарав бавцIусса жяматрахь, чIаххуврайсса щархъал жагьи-жугьултрахь, райондалул МЧС-рал филиалданул пишакартурахь дакIнийхтунусса барчаллагь тIисса бия.

З. АьбдурахIманова
Мухтардул бусаврийну, му кьини цала хIаятраву арснан дурсса цIусса къатрал магъула пуркIу най бур тIисса леххаврий чIаххуврайсса Оьмарова Жамила бувкIун бур. Ми гьант­рай шяраву бивкIу хьуну, вайннал арс Гъазигу цала дуснал ни­ттих жижара бан Лаккуйн увкIун ивкIун ур. Му кьини Гъазил цала къатраву хIаммам лавхъун бур. ХIаммам байни, усттарнаща ци гъалатI итххявххун бивкIссарив, мива кьатIув нанисса турба кIири лавгун, ганил чIарахсса тахта-тIама, цурда магъи кIири ларгун, цIу ларчIун ляркъуну дур. Щала нигь диркIун дур, цуппа къатта ччуччаврицIун, чIаравсса щарнил клуб ччу­ччавриятугу.
КIинтнил чIун, жунма кIул­сса куццуй, Лаккуйсса нехру микIларчIсса, зунттай­сса микI-марххала бассан бувасса, не­ххардиву щин чансса чIун дикIай. Мукунсса буру­ккинттарай МахIаммадовхъал кулпат буна, ца мугьлатраву ЧIарттал жямат, бадрардащал, чIатIращал, хьуллащал бувккун, цIу лещан дуллай булувкьуну бур. Вайннан багьну бур, щарния архсса кIанай микI гъавгъун, гичча, арантал, хъами-душру хIала бувххун, щин ххилан. Щарнил администрациялул бакIчи Аьбдулмажидов Микьдардул Лакрал райондалий­сса МЧС-рал филиалданул цIу лещан дувултрайнгу оьвкуну, тийн-шийн леххаву дуртун дур. Му мугьлат­рай чIаххуврайсса КIундиннал щарнил жагьилтал бувкIун бур. Мукунма, Ккурккуллал школалул директор Даниял Магьдиевлул сакиншиндарайну Ккур­ккуллал жагьи-жугьултгу кумаг­ран бувкIун бур. Ца ссятрава 5-6 тонна щинал лагайсса цIу лещан дувултрал кIива машинагу бивну бур, мува филиалданул ВицIхъавсса, муданма дежурствалийсса машинагу бивну бур. Хъунмур кумаг ялун бияннин ЧIарттал жагьилтурал хъунмасса хIарачат бувну бур клубрал къатрал вив цIу дагьан къаритан.
Мухтар гьарнайн бакIра-бакIрах барчаллагь тIий ур. Барчаллагьрай ур ЧIарттал шяравасса Аьлиев Камалуттиннуйн, Хъунбуттаев Хъунбуттайн, школалул директор Кьадиров Макьсудлуйн, Умаров МахIаммад-Расуллуйн, Мискуев Бунияминнуйн. Мукуна барчаллагь тIий ур Лакрал райондалул бакIчи Юсуп МахIаммадовлуйн, анаварсса мутталий кIукун кумаг бан шайсса цIу лещан дувултрал даву низамрайн дутаврихлу. Барчаллагь тIий ур цала щарнил бакIчи Аьбдулмажидов Микьдардухь, КIундиннал ва Ккурккуллал жагьи-жугьултрахь. Барчаллагь тIий ур Мухтар цала чIарав авцIусса, цащава хьуссаксса кумаг бан бювхъусса гьарцагу инсаннахь.
КказитрайхчIин тавакъюгу буллай ур Мухтар циняргу щархъал администрациярттал бакIчитурахь, щархъал бюджетирттацIух къабюхълай бухьурча, спонсортал лявкъуну, ягу жяматирттая дартIун, щархъаву 6-7 тонна щинал лагайсса, кIинттул чIумал микI къалачIунсса куццуй аьрщараву буччинсса, кьаллу бишинсса хIарачат бувара тIий. Цанчирча, щинал масъала Лаккуй бигьасса бакъашивугу хIисавравун лавсун, цIу лещан дувултрал машина захIматсса ххуллурдайх щархъавун бияннин цаннил ца чIаравсса къатри дусса жулла щархъив ччурччуну къагьаншиврул.