МахIаммад­садикьлул арс Мусаев Муса
Февральданул 24-нний дунияллия лавгунни щала жяматран бусравсса, дакI-аьмал хъинсса, ххаллилсса зунттал чув, Хьур­ттал шяравасса Мусаев Муса.

Муса увну ур 1941 шинал Хьурттал шяраву дувссилул ус­ттарнал МахIаммадсадикьлул кулпатраву. Хьурив 4 классгу къуртал бувну, лавгун ур цала ппу зузисса АьсатIиннал Алагир тIисса шагьрулийн.
Совет аьралуннаву къуллугъ бувну махъ увххун ур Аьшттарханнал шяраваллил хозяйствалул техникумравун. Танияр махъ Каспийск шагьрулий Ленинградуллал жамирду бай институтгу къуртал бувссар. 1973 шинал Дагъусттаннал политехнический институтгу къуртал бувну, хьуссар инженер-механик.
Зий уссия инженерну «Севкавтехмонтажстройрай». 1976 шиная шинай, пенсиялийн укканцIа, зий уссия хъунама механикну. Яла, ванияту «Севкавтехмонтаж» АО дуркун, вара даврий зий уссия. Цала дакIнийхтуну бивхьу­сса захIматрайну лайкь хьуссар личIи-личIисса бахшиширттан.
Муса, цала касму кIулсса, ххуйсса пишакар ушаврищал, ия хъинну инсантуращал хIал бавкьусса, аьркиннал чIарав ацIан махъунай акъасса, яхI-къирият дусса чув-адаминагу.
Муса жуятува личIи шаврил кьурчIишиву кIидачIлай, жижара буллай буру ванал кулпат­рахь, арсурваврахь, ссурваврахь ва махъсса цинявппагу гъан-маччанахь.
РухI хъинний дишиннав. Алжаннул ххари аннав. Махънал оьрмурдай барачат бишиннав.
Хьурттал, ХьурукIуннал
жяматру

---

Исуплул душ Жанаева ПатIимат
МукьцIалва гьантта хьунни Шахьуйннал шяравасса Жанаева ПатIимат Исуплул душ аьпа­лул хьуну. Хъунмасса хIал хьу­ссия ПатIиматлул цIуцIи шанийн багьну, зун-занан къабюхълай.

Бувну бур ПатIимат Шахьуйннал шяраву 1952 шинал даргиял миллатраясса Исуплул ва Шахьуйннал шяравасса Миясатлул кулпатраву. ЧIаххувсса ГьунчIукьатIрал школалий дук­лайгу бивкIун, ПатIимат зун бивкIун бур МахIачкъалалив Консервалул заводрай. Кулпатрал хьуну махъ бивзун бур ласнал Жанаев ХIажибуттал шяравун ГьунчIукьатIув. Бу­сса оьрмугу му шяраву лавгун бур ПатIиматлул. Шяраву зий бивкIун бур колхозрай, фермалий, шяраваллил совет­рай техничкану. Махъсса 13 шинал мутталий зий буссия ГьунчIукьатIрал дянивмур даражалул школалий техничкану.
ПатIиматлул ппу Исуп Ша­хьуйннал шяраву аслий­сса шахьуйричу куна икIайва, му цамур миллатраясса ушиву дакIнийнвагу къабагьайва. Мукунма ПатIиматгу Гьун­чIукьатIрал шяраву цала шяравущар кунма бикIайва, лагма-ялттуминнащал, архIал зузисса коллективраву бавкьуну, цуппа бусса кIану кIул къахьунну. ПатIимат бия инсаннан кумаг буван мудангу хIадурсса, оьрмулуву цинна циксса захIматшивуртту ккаккарчагу, лажиндарава пиш тачIав чан хьун къабивкIсса хъамитайпа.
ПатIиматлул бивкIулул кьур­чIишиву кIидачIлай, жижара буллай буру ванил душварахь, оьрчIахь, миннал ирсирахь, ссихь Башаратлухь, махъсса цинявппагу гъан-маччанахь. Ванин къабуллумур оьрму махънан булуннав.
ПатIиматлул рухI кIукIлуний дишиннав, бунагьирттал аьпа буваннав.
Шахьуйннал, ГьунчIукьатIрал жямат