«Дагестан» РИА-лул редакциялий хьунни республикалул агьалинан МВД-лул дуллалисса паччахIлугърал электрон журалул хIаллихшиннардая бусласисса пресс-конференция.
И. Саидова
Электрон журалул хIаллихшиннарду ишла даврия бусан журналистуращал хьунабавкьунни Миграциялул масъалартталсса буллалисса управлениялул хъунама Виталий Пучков, УГИББД-лул экзаменну дулаврил ва регистрация даврил отделениялул хъунама инспектор Асхабаьли МахIаммадов, ПаччахIлугърал хIаллихшиннардал отделениялул информациялул центрданул хъунмур Гульнара Вердиева, УГИББД МВД-лул районнал дянивсса регистрациялул ва информациялул отделданул инспектор Ссунгъур ХIусманов.
Асхабаьли МахIаммадовлул бувсунни районнайсса экзаменну дулаврил ва регистрация даврил отделлал электрон журалий дуллалисса хIаллихшиннардая. ХIакьинусса кьини вай отделлай электрон журалий кьамул дуллай бур экзаменну, дуллай бур водительтурахьхьун машинартту бачин бувансса ихтиярду, сияхIрайн ласлай бур транспортру.
— ХIакьинусса кьини республикалий буссар 8 МРЭП. Так ца ларгсса шинал республикалул МРЭП-ттай электрон журалий щаллу дурну дур 216 329 хIаллихшинна. Му бакъассагу, МВД-лул паччахIлугърал порталданийн вай хIаллихшиннардал хIакъираву бувкIун бур 81408 аьрза, — увкуна МахIаммадовлул.
Ванал кIицI лавгунни агьали хIаллихшиннардал дузал буллалини хIисавравун ласлай бушиву миннал тIутIимур. Мукунма Асхабаьли МахIаммадовлул бувсунни агьалинаща цанма учин ччимуния ва диялдакъашивурттая бусласисса аьрзри кьабитан бюхъайшиву «Ваш контроль. Ru» тIисса МВД-лул сайтрай.
Гульнара Ведиевал бувсунни «Единый портал государственных и муниципальных услуг» сайтрайхчIин ва www.gosuslugi.ru электрон адресрайхчIин гьан буван бюхъайшиву хIаллихшиннарду дузал даврил хIакъиравусса аьрзри.
Виталий Пучковлул цала ихтилатраву кIицI лавгунни УВМ МВД-лул хIаллихшиннардал порталданийхчIин ласун бюхъайшиву цIусса журалул загранпаспортру, ласун ва баххана буван бюхъайшиву Аьрасатнал граждан паспортру.
Гьашинусса шинал январь ва февраль зуруй МВД-лул порталданийн вай хIаллихшиннардал хIакъираву бувкIун бур 4 азарва аьрза.
Яла чIяруну ишла даймур хIаллихшинна хъанай дур загранпаспортру ласаврилмур.
