Уттигъанну на, ттулла цIуллу-сагъшиврул хъирив бувккун, багьра Дагъусттаннал хъазамрал хирургиялул центрданийн. Ги­кку ттуятува тIалавмургу бувну, палаталуву ккаккан бувсса кIанай уттубивхьуну махъ кIул хъанан бивкIра ттула чIаравминнащал, ялун бухлахисса хIакинтуращал, медсестрахъащал. Гайва гьант­рай ттула ялун жагьилсса хIакин Закаржанова Заира буххайхту, дакIниву цирив ца гьанавиххишивугу хьуна. Га, ттула ялув бавцIуну, на хъин буллантIисса хIакин бушиву кIул шайхтурив, гьанавиххишиву кIилий ххи хьуна. Ттухьва нава цалчин кусса махъругу «ва жагьилсса, пишакаршиврул сантрагу лахьхьин дурасса, хIакинная ттунма ци кумаг хьунавав?» тIисса бия.

ТтучIанма гъан хьуну, хIа­лимсса пишлищал нахIусса мазрай ссихI дурккукуннив, ттуву­сса жагъаласса пикрирду ххивуну лавгуна. Азарханалий дур­сса 4 нюжмарданул мутталий га жагьилсса хIакиннал нахIусса ихтилатралва хъин бувнав. Утти хIакиннал нахIуну бувсъсса мукъула инсан хъин айшиврийн мукIру хьумурда на. Га хIакин цуппагу лаккудуш бия. Амма талихI, жула яруссаннал жалин бия. КъакIулли, чун ялугьлай бивкIссарив лакрал жагьилтал (хъярч!).
Заирал 2002-2008 шиннардий къуртал бувну бур Дагъус­ттаннал медициналул академия. Хъирив ккалай бивкIун бур хирургиялул клиникалул ординатуралий.
2011 шиная шинмай ва зий бур хIакин-хирургну Дагъусттаннал хъазамрал хирургиялул центрданий. Шиккугу Заира бур цищала архIал зузиминнал, цила къашайшалтрал дянивгу бусравсса хIакин.
Мукунма хъунмасса барчаллагь учин ччай бур лакку кказитрайхчIин ца цамагу ла­ккучу, центрданул торакальный отделениялул хъунаману зузи­сса МахIаммадбеков Ширвани Юсуп­лул арснахь. Ваналгу, гьарца кIюрххил циняв палатардавун увххун, жул дакIру тирх учин дансса махъру учайва. ХIасил, ва центрданий зузисса пишакартал цалла давуртту кIулсса, лахъсса даражалул зузалт бия, хIакинная тIайла хьуну, марцIшиврулсса буллалисса зузалтрайн бияннин. Зул давриву тIайлабацIуртту чIявусса хьуннав, къашайшалт рязину личIанну зунсса гъира лекъащаннав.
Хъунмасса хIурматращал яруссаннал «ХIакьикьат»
кказитрал корреспондент
Шамай Къазанбиева
ХIадур бувссар
З. АьбдурахIмановал