Ялун дуркIсса 2017 шинал Дагъусттаннал муниципал театрдал творчествалул давурттацIун кабакьин, театрдан кумагран федерал бюджетрава итадакьин ккаккан дурну дур 39 миллион 370 азарда къуруш арцул.

Бадрижамал Аьлиева
Аьрасатнал Федерациялул 56 субъектрал бюджетирттал дянив бачIин ккаккан бувсса субсидиярттал лагру дур 670 миллион къуруш. Миннувагу ларай кIицI дурсса арцу дучIан най дур Дагъусттаннал муниципал театрдал аьркинлугъран. Укунсса информация дуллуну дур Министртурал кабинетрал сайтрай.
«Бувсса хIукмулийн бувну, 2017 шинал субсидиярттал 670 миллион къуруширттайн дирсса лагру кка­ккан дурну дур Аьрасатнал 56 субъектрайх дачIин, 300 азаруннийн бивсса инсантал ялапар хъанахъисса шагьрурдал муниципал театр­дал даврил чIарав бацIан ва ми театрдал материалданул ва техникалул база цIакь буван. Вай арцу итадакьлакьиссар «Развитие культуры и туризма» на 2013-2020 годы» тIисса паччахIлугърал программалул лагрулий», – чивчуну бур документрачIансса справкалий.
Субсидияртту дачIаву хъин чулий ккарккун дур бюджетирттал дянивсса арардал масъалартталсса байсса комиссиялул заседаниялий.
Документ ххал бивгьуну ва хъин чулий ккавккун бур 2017 шинал январьданул 26-нний хьусса Аьрасатнал Федерациялул ХIукуматрал заседаниялийгу.