Исмяйл арс Исмяев МахIаммад

Январьданул 28-нний, ца зурува хъанахъисса цала 90 шинал юбилейрайн кулпат, циняв гъан-маччамигу хIадур хъанай кьабивтун, цIал-цIуцIаву дакъана, инжит къавхьуна, паракьатну тамур дунияллийн лавгунни мяйжаннугусса зунттал яхIлув, дяъвилул ва захIматрал ветеран, Гьаруннул цIанийсса, билаятрайх цIа ларгсса Ккуллал колхозрал хьхьичIа-хьхьичIсса механизатор-тракторист Исмяев МахIаммад Исмяйл арс (Сасу-МахIаммад).
МахIаммад увну ур 1927 шинал мартрал 19-нний. Дяъви байбишайхту, хъуними уссур­вал Мута ва МахIмуд фронтрайн лавгукун, 7 класс къуртал був­сса МахIаммад ацIаву дакъа зун ивкIссар ссурвавращал архIал ичIаллил ва колхорал давурттай. 1942-ку шинал тIайла ув­ккун ур захIматрал фронтрайн – МахIачкъалаллал ва Двигательстройрал лагма-ялтту къанавртту дуклан. Чумартсса чIава жагьилнал захIматран кьимат бишлай, ванан дуллу­ссар «Дяъвилул ветеран» цIа ва «За оборону Кавказа» медаль. Дяъви къуртал хьуну махъ, Щурагь профтехучилищагу бувккуну, шавкьирай зун ивкIссар колхозрал трактористну ва шупирну. 1948-1951 шиннардий лавай­сса даражалий лавхъссар аьрали къуллугъ. Зий ивкIссар механизаторну, къурнил бригадалул бригадирну ва цаймигу давурттай.
1954 шинал щар дурцуну, 62 шинал мутталий оьрмулул дус КкурцIу-ПатIиматлущал ччаврил ва ххирашиврул ялтту нанисса оьрму бувтссар. Хъуни бувну, дуккин бувну, оьрмулул лайкьсса шачIанттайн гьаз був­ссар 5 арс ва 2 душ, гайннал 20 оьрчI-душ (внук-внучкахъул), гайнналгу цалсса 10 правнук-правнучкахъул.
Цала инсаншивруцIун, дакI хъиншивруцIун ва къирият­рацIун Аьйша-Разухъал бугьарасса тухумрал ялун нанисса никиран цинявннанагу МахIаммад ппу куна ххирассия. 1987 шинал МахIаммадлул ссурахъу Султанхъал Хьхьирил-МахIад аьпалувух лавгния шинай, вай махъсса 30 шинал мутталий, Сасу МахIаммад Аьйша-Разухъал тухумрал бусравсса хъуначувъя.
Лавгунни утти аьпалувун МахIаммад. Алжаннул ххари аннав цув, гьав нурданул дуцIиннав!
МахIаммад ахиратравун тIайла уклакисса кьурчIишиву кIидачIлай, жижара буллай буру ванал аьзизсса оьрмулул дуснахь ПатIиматлухь, арсур­ваврахь МахIмудлухь, СалихIлухь, Оьмар­духь ва ХIажимахIаммадлухь, душваврахь Нуржигьаннухь ва Надеждахь, миннал наслулухь, щалва Аьйша-Разухъал ва ЩяйтIан-АхIмахъал агьулданухь.
Ккуллал жяматрал
цIанияту Киров Султанов