Январьданул 12-нний Дагъусттаннал паччахIлугърал университетрал филологиялул факультетрал актовый залдануву хьунни Республикалул Оьрус мазрал ва культуралул центрданул ларгсса шинал лажиндарай дурсса даврил жаваб дуллалисса шадлугърайсса батIаву.

Бадрижамал Аьлиева
Мажлис тIивтIунни му Центрданул директор Лариса Кукановал. Мунил бувсунни тIивтIуния шинмай, хьусса ца шинал мутталий, Центрданул дурсса чIяру-чIярусса давурттая, барчаллагь увкунни цала чIарав бавцIусса, ка-кумаг бувсса цинявннахьвагу, мукъуйну, маслихIатрайну бикIу, иширайну бикIу. РЦРЯиК-лул (Республиканский центр русского языка и культуры) дуллалисса давриву чIарав бацIаву дурминнан буллунни Барчаллагьрал чагъарду, махъсса цинявппагу хъамаллуран тIурча, Рождестволул бахшишру хIисаврай, дуллунни Центрданул логотип дусса ручкарду. Цилва ихтилатрал ахирданий Лариса Борисовнал чIурчIав дунни, ялун дуркIсса шинавугу цащава шаймур ва ца ххишалагу бувантIишиву Центрданул хьхьичI бивхьу­сса масъалартту щаллу буван, цивгу тIайла бувсса чIяву миллатру бусса, бартбису кунма яргсса, ранг-рангсса, Дагъусттаннал оьр­мулул буллугъшиврийн.
Ва шадлугъравух гьуртту хьун бувкIун бия бусравсса хъамалгу: Оьрус миллатрал агьалинал масъалартталсса байсса ДР-лул ПаччахIлугърал комиссиялул председательнал хъиривчу, секретарь Н. Евсеева, ДР-лул Жяматийсса палаталул член ХI. Аьзизова, «Город Каспийск» шагьрулул округрал бакIчинал хъиривчу Л. Левицкая, ПаччахIлугърал Центральный архиврал директор О. Бекаева, Р. ХIамзатовлул цIанийсса Миллатрал библиотекалул директорнал хъиривчу Р. ХIамзатова, ДР-лул Миллатрал политикалул министерствалул управлениялул начальник М. Даитбеков, ДР-лул Жагьилтурал иширтталсса байсса министерствалул вакилтал, мукунма МахIачкъала ва Каспийск шагьрурдал личIи-личIисса идарарттал вакилтал.
Шадлугърал тамашачитуравух чIявуя республикалул школардал дуклаки оьрчIру ва вузирдал студентътал. Мажлис яла-яла хIаз бивзуна жулла республикалул хъун шагьрулий ларайсса кIулшиву ласлай дук­лакисса Африканавасса студентътуран.
Махъру лавхъун махъ, концертралмур бутIа байбивхьунни оьруснал миллатрал хьхьичIарасса аьдат ккаккан даврийну. Шагьрулул 52-мур прогимназиялул дук­лаки оьрчIал ва РЦРЯиК-лул зузалтрал оьруснал миллатрал ярг-яргсса яннардаву ккаккан дунни оьруснал халкьуннал цаймигу аьдатру ва байранну. Каспийскаллал музыкалул ва хореографиялул кIулшиву дулайсса гимназия-интернатрал оьрчIал ккаккан дунни «Калинка» ва «Горский» къавтIавуртту. Увкунни ххаллилсса балайрду. ЦIа дурксса балайчитурава ва шадлугъравух гьуртту хьун увкIун ия Дагъусттан Республикалул халкьуннал артист, Опералул ва балетрал театрданул солист МухIсин Камалов. Концерт къуртал хьунни ПаччахIлугърал Къизлардал Терский казачий ансамбльданул балайрдайну.
Ва кьини ДГУ-рал филологиялул факультетрал актовый залданувун бавтIми хъинну рязийну ва Центрданул зузалт­райн бусрав-барчаллагьрай бия укун ххаллилсса шадлугърахлу.