Январь зурул 15-нний Поэзиялул театрдануву хьунни «Мурад Къажлаев – Оьр­мулия, Музыкалия, Ттуятува» тIисса документал фильмрал премьера.

ПатIимат Рамазанова
Машгьурсса композиторнал ва Совет Союзрал халкьуннал артистнал оьрмулиясса кинорал премьера ккаккан увкIунни Дагъусттаннал ХIукуматралПредседательнал цалчинма хъиривчу Анатолий Карибовгу. Ванал республикалул хъуниминнал цIанияту барча унни Мурад Къажлаев. «Жува чув хьунабакьирчагу, вищалсса хьунаакьаву мудангу байрансса дикIай, вил творчествалул ххуллу – ватандалул культура ххирашиврул ва вила пиша чIувну ххирашиврул яргсса ккаккияр. Вил произведениярттал мудангу тIааьнсса асарду кьабитай дакIурдиву», — увкунни Анатолий Карибовлул. Мурад Къажлаевлул оьр­мулиясса ва творчествалиясса фильм ккаккан дунни гьамин мунан 86 шин хъанахъи­сса кьини. «Алания» ГТРК-лул студиялул хIадур дурсса фильмрал режиссер ва сценарист ур Рафаэль Гаспарянц, оператор – Михаил Немысский. Рафаэль Гаспарянцлул балжину бувсунни цува фильмраха шавкьирай зий ивкIшиву: «Дурусну шинал хьхьичI жу Мурад МахIаммадовичлул юбилейрал съемкарду дурссия, тания мукьах жу архивраву хьхьичIарасса, духсса записьру ххал дурссия, сайки кIиттуршра ссятрайсса записьру, ттуршлийсса ттизаманнул видеогу ххал дурссия. Ва жу хIадур дурсса документал журалул фильм-портретрал Мурад МахIаммадовичлул оьр­му гьарцагу чулуха ккаккан буллалиссар, мунал монологру, кинохроникалул нажагьсса кадрарду дуссар».
Мурад Къажлаевлулгу, фильмраха зий бивкIцириннахь барчаллагь тIий, кIицI лавгунни Рафаэль Гаспарянцлул мяйжаннугу хъуннасса даву дуршиву. «Жула заманнай укунсса киносурат хIадур дуван захIматри, материал щалвагу билаятрайх тили-хъили хьуну дия, билаятрал гьарцагу мурцIния тIиссакссагу, материал датIлан багьуна. ТтучIан чIявусса чагъарду найнма бур инсантурая, ми ттухь музыкалия, оьрмулия, творчествалия суаллу буллайнма бур, ва киносуратраву лякъинтIиссар ми суаллансса жавабру. Тамашачитурал цалва бищунссар ва даврин кьимат. На дакIнийхтуну барчаллагь тIий ура ттулашиврий ва захIмат бивхьуцириннахь», — увкунни Мурад МахIаммадовичлул. Юбилярнал барчаллагь увкуна цинявппагу цува барча увцириннахь.
Киносурат ххал дурну мукьах мунил цайнма ххуйсса асарду биян бувшиву бувсуна Дагъусттаннал Чичултрал союзрал председатель МахIаммад АхIмадовлул, ПатIимат ХIам­затовал цIанийсса Дагъусттаннал изобразительный искусствардал музейрал директор СалихIат ХIамзатовал, Поэзиялул театрданул директор Елена Гьаруновал, Аьрасатнал Кинематографиялул союзрал Дагъусттанналмур отделениялул председатель МахIаммад Сулаймановлул ва цаймигу бусравсса инсантурал.
ХIакьинусса кьинигу машгьурсса композитор, мэтр Мурад Къажлаев музыкалуха зийна ур. Дагъусттаннай мунал балет «Имам Шамил» ва оперетта «Валида» лавай­сса даражалий ккаккан був­ссар, мунал творчество ххирами Мурад МахIаммадович цала творчествалуву симфониялул музыка миллатрал ккавкказуллал мотиврдащал усттарну экьинани бувсса магьирсса ссихIирчинан ккалли уллай бур. Жугу барча уллай буру лакрал язисса арснал киносуратрал премьерагу, увсса кьинигу. ЦIусса произведениярттайну агьали ххари- хIайран буллансса цIуллушиву дулуннав вихьхьун, Мурад МахIаммадович!