Ларгмур шинал оьрчIрунияр гьарзану душру бувну бур. Ва шин дайдирхьуния шинмайгу хъуншагьрулий бувну бур 400-ксса оьрчI.

Уттигъанну социал сетьраву жула билаятрай зузи­сса Китайнавасса жагьилнан дагъусттан душ щар хъанахъи­сса хъатIул суратру бакIрайн дагьунни. Суратирттайну чIалай бия, хъатIи хъунмурчIин жула шихсса аьдатирттайн бувну буллай бухьурчагу, жалин ва наврузбаг китайнал халкьуннал янна-калуву бушиву. Суратирттал лувсса чIяруми комментариярттайхчIингу чIалай бия жула халкьуннаву, хаснува жагьилсса душвавраву, цамур культурагу, дингу дусса кьатIаллил билаятирттайн эшкьилул лавсун щар хьун кьисмат хьурча, цукунчIавсса нигь дакъашиву, цIусса кIанай миналулгу хьуну, цIусса кулпатрал гьану бизан.Так цаннал ца лавсун, цаннан ца бувчIуну, цаннал тIимур цаннан баллай яхъанарча.[pullquote]Ларгсса шинал був­сса ташурдаву 150-ксса ташу хьуну бур чил хIукуматирттал халкьуннащал. Миннавух бусса бур Украиннавасса, Азирбижаннавасса, Белоруссиянава­сса, Бразилиянавасса, Индиянавасса, ЮАР-навасса ва цаймигу кIанттурдаясса халкь.
[/pullquote]
Утти бурганну ларгсса 2016 шинал МахIачкъалалив цIуну бувсса ва личIи хьусса кулпатирттал хIасиллахгу. Духмур шинал, масалдаран, Дагъусттаннал хъуншагьрулий 3700 цIусса кулпат бувну бур.
МахIачкъалаллал администрациялий Граждан иширттаха зузисса управлениялул отделданул пишакар Ольга Аьбдуллаевал бусаврийну, хъуншагьрулий шиная шинайн вайксса кулпат­ру шаврил хIасил даххана хьуну дакъар. Амма гьарза хьуну бур, личIи хьуну, кIилчин щар хьу­сса, щар дурцусса ишру. Шиккугу хъаминияр арамтал гьарзану бусса бур. Масалдаран, 2016 шинал, цалчинмур ташу талихIрайн къабувккун, кIилчин ташурду бувну бур 464 адаминал ва 286 хъамитайпалул.
ЗАГС-рал зузалтрал бусаврийну, кулпатру бан сукку хьуми оьрмулул 20-30 шиннардивусса халкь бур, амма хьунабакьай­сса бур оьрму лавгсса, бугьара­сса халкьгу.
Шиная шинайн чIяву хъанай бусса бур, на ялув кIицI бувсса мисалдануву тIийкун, чил билаятирттаясса жагьи-жугьултращалсса ташурдугу. Масалдаран, ларгсса шинал бувсса ташурдаву 150-ксса ташу хьуну бур чил хIукуматирттал халкьуннащал. Миннавух бу­сса бур Украиннавасса, Азирбижаннавасса, Белоруссиянава­сса, Бразилиянавасса, Индиянавасса, ЮАР-навасса ва цаймигу кIанттурдаясса халкь.
Чан-кьансса пашмансса хIасиллаягу. Аьмну бувсса ташурдал 30% лияйсса бур. Ларгсса шинал азарунниха ливчу­сса кулпатру личIи хьуну бур. Ши­кку кIицI лаган, ЗАГС-рал зузалтрал хъуннасса даву дайсса дур, личIи хьун аьрза булун бувкIсса лас-щарнищал ихтилатру буллай, маз-кьазру бихьлай. Цал-цал, миннуя мюнпат хьуну, лас-щарнил пикри бувну, аьрзарду махъунмай лавсъсса ишругу шайсса бур.
ЦIусса шин дайдирхьу­сса январьданул зузи гьантрая хIакьинунин ттуршунниха ливчусса жагьилтурал цIусса кулпат­ру бансса аьрзри чивчуну бур.
Хъуншагьрулул ЗАГС-рай дур, халкь лахъи очередирттал азурда къабувну, низамрай дачин дурсса даву. Масалдаран, оьрчI бувшиврул чагъар, муницIунма цал булайсса пособиялунсса справкагу ласун бюхълай бур кIюрххил аьрза буллуну, ахттая махъсса чIумал. Мукунма оьрчIшиврий битан ччисса нитти-буттахъаясса аьрзригу. Шиккугу, масалдаран, ларгмур шинал мукунсса нитти-буттахъаясса кIиттуршунниха ливчусса аьрзри кьамул бувну бур. Ванилгу тасттикь буллай бур оьрчIшиврий арс, душ битан ччими чагъардал аваралухун къабувтун, ЗАГС-рал зузалтрал лахъсса даражалий цалла даву дуллай бушиву. Вайннал бусаврийну, махъ ппурттуву оьрчIан дизайсса цIардаву жула халкьуннаву хъинну машгьурну дусса дур МухIаммад, Абубакр, Рамазан, Хадиджа, Сафия тIисса цIарду. ЧIяву хьуну бусса бур оьрчIан Адам тIисса цIа дизлазисса ишругу. Уттигъанну бувсса ца душнин, нитти-буттан хъинну ччай, Бахубриллиант тIисса цIа дирзсса ишгу хьуну бур. Хьуну бур кIинничалтран Адам ва ХIава тIисса цIарду дирз­сса ишгу.
ЗАГС-рал пишакартурал бусаврийну, ларгмур шинал оьрчIрунияр гьарзану душру бувну бур. Мукунма, гайми шиннардих бурувгун, гьарза хьуну бур кIива ва ххишаласса оьрчIру бусса кулпатругу.
50 кулпатраву бувну бур кIинничалт. МахIачкъалалив чIяву оьрчIру бусса кулпатирттавасса ца кулпатраву мяйлчинсса оьрчI бувсса иш хьуну бур. «Кулпатрал заллу, мяйва оьрчIал ппу, жул муданасса муштарири», — хъярч буллай бур управлениялул пишакартал.
Ва шин дайдирхьуния шинмайгу хъуншагьрулий бувну бур 400-ксса оьрчI. ХIасил, ЗАГС-рал зузалтран даву чансса да­къар.
Шиккува кIицI бан, гьашину хъуншагьрулул ЗАГС-ран 100 шин хъанахъи­ссар. Гьар кьини халкьуннащал зий, цавайннан оьрчI баврил справкарду дуллай, цавайннаща ташу баврил аьрзри кьамул буллай, цавайннащагу паспортирттай цIарду, хIарпру даххана дан­сса аьрзри кьамул буллай, инсан ивкIушиврул справкарду дуллай, зий бур шикку бавкьусса, нахIу-хIаласса коллектив. Вайннал каялувчишиву дуллалисса Заира Оьма­ровагу, цIуну хьусса кулпатру яшаву мурадрай, оьрчIру гьарзану бавриву цала чулуха­сса шартIру дузал дуллай, кулпатирттал гьанурду жула буттал буттахъал аьдатир­ттай бизаврил ялув бавцIуну, лахъсса даражалий цилла даву дуллай бур.
Шикку хъинну ххуйну, тя­хъану кIицI лагайссар Халкьуннал дянивсса кулпатрал, ОьрчIру буруччаврил, Кулпатрал, ччаврил ва хаин къашаврил кьинирду. Мукунма шадлугърал тагьарданий сияхIрайн ласайсса бур чIярусса шиннардий лас-щарнил дяниву оьрчI къабивкIун, кIинничалт, шанничалт бувсса ишругу. ЛичIи-личIисса байраннал хьунийн чIярусса шиннардий цачIу ялапар хъанахъисса лас-щар барча бувну, миннал кулпатру эбратран бувцусса шадлугъругу шайсса дур.
«Жул даву, ялун чIалан захI­матсса духьурчагу, дур хъинну хIазсса ва халкьуннан ххаришиву дуллалисса. ХъунмурчIин жун минная так барчаллагь бакъа къабаяй. ЦIусса кулпат шаву, кулпатраву оьрчI ляхъаву – му бур гьарналвагу талихI-тирхханну, ххаришиву. Жугу му ххаришиву кIидачIин жула чулухасса хIарачат бару, хьуссаксса анавар дуккан дурну, бигьа дару чагъардацIун дархIумур даву», – буслай бур ЗАГС-рал пишакартал.
ЗАГС-рал ккаккиялун кка­ллийсса, цинявннал итталун дагьайсса чIюлушиннанугу хъанахъиссар, 35 шинал мутталий сайки гьар кьини наврузбагнал ва жалиндалул цIарду чичайсса, хъунмур зал ва, кулпат­рал лишандалун ккаллийсса, залданул чIирайсса генеологиялул мурхь. Вагу жула хъуншагьрулул чIиви-хъунсса тарих чичлачисса мурцIу хъанай бур.
Лажин хIадур дурссар
Залму АьбдурахIмановал