Ноябрьданул 29-нний Шеърилугърал театрдануву сайки ца нюжмардий най диркIсса «Воспевшие Дагестан» цIанилусса Рес­публикалул театрдал фестиваль-конкурсравух гьуртту хьусса театрдал дяниву яла ххуйну, цIа данну пьесарду щаллу бувсса театр­дал цIарду ришлашисса ва фестиваль лакьлакьисса батIаву хьунни.

Ши­ккува дакIнийн бутан, конкурс сакин дурну диркIссар ДР-лул БакIчи Р. АьбдуллатIипов чIарах ацIаврийну ДР-лул Культуралул министерствалул.
Фестиваль-конкурс сакин дуваврил хъунмур мурадгу бивкIссар шеърилугърал ирсирах, жула цIаларгсса шаэртурал творчествардах гъира бутаву, актертурал, режиссертурал пишардал даража лахъ баву, экспериментрал журалий художествалул, театрданул магьирлугъраву ми машгьур дансса цIу-цIусса ххуллурду лякъаву.
Вай гьантрай Шеърилугърал театрданул сахIналий Дагъусттаннал сайки циняв театрдал цала пагьму, усттаршиву, актертурал тIуркIулул даража ккаккан бувунни. Кка­ккангу бувунни цала дакIнива нани­сса мукъурттийну жула Дагъусттан бюхттул бувсса бусалардавун багьсса инсантураясса пьесарду.
Конкурс лакьлакьисса кьини жюрилул дурунни цалами кьиматру бивщусса хIасиллугу. Вайннал пикрилий, яла ххуйну, цIа данну цала усттаршиву ккаккан дурну дур «МахIмуд ва Муи» тIисса пьеса бивхьусса ХI. ЦIадассал цIанийсса Яруссаннал музыкалул ва драмалул театрданул, «Ккурккуллал Щаза» бивхьусса А. Къапиевлул цIанийсса Лакрал музыкалул ва драмалул театрданул ва «Кьалухраясса Мирза» тIисса Табасараннал драматический театрданул.
Жюрилул мукунна цIарду дурунни литературалул ва музыкалул композициярду ххуйну щаллу дур­сса «ДялирчIсса концерт» тIисса пьеса бивхьусса Оьруснал театрдания, «Щаращи» тIисса пьеса бивхьусса Къумукьнал театрдания ва «Ттул умуд» тIисса пьеса бивхьу­сса Оь. Батирайл цIанийсса Даргиял театрдания.
Жюрилул лахъсса кьиматру бивщусса вай театрдан дулун ккаккан бувунни 500 азарунния 300 азаруннийн дирсса арцул премияртту.
Михаил Лермонтовлул образ ххуйну ккаккан дурсса Дагъус­ттаннал опералул ва балетрал актер ­Оьмар Оьмаровлун ва Дагъусттаннал Ссихьрал театрданул актер Мурад Агъамаевлун ДР-лул Чичултрал ва Театрдал деятельтурал союзир­ттал цала чулуха дулун ккаккан дурунни хасъсса бахшишру.
— Фестиваль нанисса вай гьантрай театрдануву мяйжаннугусса шеърилугърал ссихI бия. ХIакьину жува бавтIун буру хъинну агьам­сса иширал хIасиллу дуван. Ва сайки циняв театрдал битан аьркинсса лахъисса ва тIайлабацIусса ххуллул дайдихьур. ДакIнийхтунусса барчаллагь учин ччай бур зула зунттал билаятрал ххазинарду ккаккан бан хъунмасса хIарачат бувсса актертурайн, режиссертурайн, театрдал каялувчитурайн. Умуд бур вания гихунмайгу мукунссава гъираращал, гьавасращал зу фестивальданувух гьуртту хъананссару тIисса, — увкунни фестиваль-конкурсрал жюрилул председатель, театровед Виктор Малыгиннул.
Дагъусттаннал Театрдал деятельтурал союзрал хъунама Айгум Айгумовлул кIицI бувунни, фестивальданул чIалачIи дуршиву жулла театрдал коллективирдал усттаршиву, даража. Заманалуха лархьхьусса захIматшивуртту дунугу, актертурал цала язи бувгьусса пишардал бюх­ттулшиву ккаккан дуршиву.
Мукунма ванал ххи бувунни, жюрилул конкурсравух гьуртту­сса театрдан кIанттурду къабуллуну, цал хIукму бувшиву яла ххуйну, лайкьну пьесарду ккаккан бувсса театрду кIицI бан.
Цал ттигу жула щала миллат­рал цIания дакIнийхтуну барча буллай буру гьар кIаная ххувшавурттащал зана шайсса, ва ххуллухгу бюхттулну цала гьунар кка­ккан бувсса, Апанни Къапиевлул цIанийсса Лакрал театрданул коллектив! Зун тIайлабацIу баннав, ца лакрал бакъа, вайми-вайми миллатирттал тамашачиталгу хIайран буллансса пьесарду бихьлансса гьавас ххи хьуннав зул актертураву!