«Кавказский экспресс» альманахрал презентация

elemente_7Декабрь зурул 13-нний Расул ХIамзатовлул цIанийсса Миллатрал библиотекалуву хьунни «Кавказский экспресс 2016» тIисса литературалул ва художественный альманахрал презентация.

ПатIимат Рамазанова
Ва лу итабавкьуну бур «Дагестан» издательский домрал, терроризмалул идеологиялийн къарши­сса программалийн бувну. Луттираха зий бивкIминнал тIийкун, укун­сса луттирдал тарбиялул бияла хъуншиврий ва цIусса гьунарду ялун личин байшиврий, инсантураву граждан позиция цIакь бувайшиврий дакI дарцIуну. Презентациялий ихтилатру буллай, Дагъусттаннал халкьуннал чичу МахIаммад-Расул МахIаммадовлул, чичулт Саид Ниналаловлул ва Ххамис Шамиловал, художник Ибрагьим-Халил Супияновлул, театровед Гулизар Султановал, искусствовед Мариян Чалабовал ва цайминнал кIицI лавгунни ва альманах уникальныйсса бушиву, ва итабакьавугу Дагъусттаннал культуралуву ккалли бувансса, агьамсса ишну хъанахъишиву, альманахрай щалвагу Ккавкказнаву­сса ва кьатIаллил билаятирттая­сса автортурал произведенияртту бушиву, чIярусса, личIи- личIисса жанру цивунна ларсъсса, бу­ккин гъира бутлатисса лу бушиву. Машгьурсса классиктурал цIардацIун, яргсса цIусса цIардугу душиву. Ва альманахрал сиптачигу, сакин бувмагу ур гьунар бусса художник ва журналист Марат ХIажиев. Утти­нингу дагъусттаннал, ккавкказуллал литература машгьур дуллай биялсса захIмат бивхьу­сса, цIу-цIусса проектирдах луглайнасса, аьзизсса ватандалун ци хъинбала буван хъинавав тIийнасса зунтталчу –патриот, «Горцы» кказитрал хъунама редактор. Альманахрал жаваб дулайсса редактортал бур Марат ХIажиев, Саид Ниналалов ва Юлия Зачёсова. Альманах чIюлу бувсса ххаллилсса суратирттаву дур Амин ва Камил Чутуевхъал, ПатIимат ХIусайновал, Марат ХIажиевлул цалла рирщусса суратругу. Бюхъай ми лак бушиврул бияла бикIангу, тамансса суратру лакку инсантурал ва лакрал оьрмулувасса дур. Вагу жуннасса ца тирхханнур.
КьюлтI буллай бакъара, ттунма хъинну тIааьн бивзшиву ттулами шеърирдугу альманахрай бушиву. Миллатирттал чичултрал прозагу, поэзиягу луттираву таржума бувну буллуну бур. Так ттулми шеърирду бур лакку мазрай ва ­оьрус мазрай буллуну. Яъни кIивагу мазрай анжагъ ттулсса бур. Лакку маз ххирашиврул ттун ва иширавугу ца ххуйшиву чIалай дур. Альманах цуппагу хъинсса, бювчIусса ча­гъардай бивщуну бур. Гьай-гьай, альманахрал мужаллатгу, чIалачIингу ххуй дуллалисса канил суратирттал авторгу Марат ХIажиев ур. Гьаннай­сса, альманахраву цачIун хьуну дур магьирлугърал циняв журардугу, литературалул жанругу: проза, поэзия, таржумартту, суратрищултрал ва художниктурал магьирсса каруннил ссихIирданул загьир дуваймур. Ва альманахраха чялишну ва гъирарай зий бивкIминнал «Кавказский экспресс­рал» хъаттирдай, поездрай кунма, жува буцлай буру литературалул ва искусствалул караматсса дунияллийн. Караматсса дунияллий дур­ссар цалчинмур ликказан. Ва хъиндайдихьур. Ялун итабакьлантIисса луттирдал сериялувасса цалчинмур хъитри. Ххуллухъин баннав!