Авиация мудангу тIалавну дуссар

elemente_13Декабрь зурул 7-нний кIицI лагайссар Дунияллул халкьуннал граждан авиациялул кьини. ХIакьинусса кьини транспортрал системардаву ца яла агьаммур кIану бугьлагьимурну ва чIявуми агьалинал чялишну ишла дуллалимурну дур граждан авиация.

Аьрасатнал авиакомпаниярттаву хьхьичIра-хьхьичI хIасул хьуминнавасса ца хъанай дур Дагъусттаннал авиакомпания. Республикалул авиакомпаниялул гьану бивзун бур 1927 шинал. ЦIусса шинал, февраль зурул 3-нний, дагъусттаннал авиатортурал кIицI лаган най бур авиапредприятиялул 90 шинал юбилей. Дагъусттаннал граждан авиациялул бакIщаращуй бивкIссар цикссагу ххаллилсса, тивталсса ва бусалардавун багьсса летчиктал. Буниялагу ва пиша язи бувгьумигу бур даврил ларайсса пишакаршиву дусса, цала пишалийн дакI тIайласса ва хъинну хъунисса тIалавшиннарду биттур дуллай зузисса инсантал.

И. Саидова
ХьхьичIавасса цIанихсса летчиктуравасса ур чIярусса шиннардий авиаэскадрильялул командирну, «Авиалинии Дагестана» ОАО-лул воздушный сообщениярттал агентствалул хъунаману, «Авиалиниярттал» летный службалул штаб­рал хъунаману зий ивкIсса Кимпаев Мансур Адамович. Ва ур, хIакьинусса кьинигу цала пишалийн хаин къавхьуну, щала оьрму авиациялун хас бувсса инсан.
Леххаврил профессионализмалуву, жагьилсса пилотътал хIадур бавриву ва давриву дурсса хьхьичIунсса ккаккиярттахлу Мансур Адамович лайкь хьуну ур командиртурал чулухасса цикссагу хIурматрал чагъардан, СССР-данул Граждан авиациялул ва ДАССР-данул Верховный Советрал Президиумрал, личIи-личIисса отраслирдал ва ведомствардал чулухасса ХIурматрал грамотардан.
Краснокутскаллал граждан авиациялул летный училищалуву дук­лакисса чIумалгу хьхьичIунну дук­лакисса ва низамрава къауккай­сса Кимпаев Мансур лайкь хьуну ур училищалул начальникнал чулуха­сса ХIурматрал грамоталун. Сельхозавиациялул авиаэскадрильялул командирну зузисса чIумалгу ванан, цIанихсса зузала хIисаврай, бахшишран буллуссар «Жигули» автомобиль. Леххаврил ларайсса профессионализм дусса пишакар Мансур Адамович лайкь хьуссар «За безаварийный налет 10000 часов» тIисса, нажагьссаннан дакъа къадулайсса, бусравсса хIурматрал лишандалун. Мансур Адамович ур Дагъусттан Республикалул транспортрал лайкь хьусса зузала. Му бакъассагу, ва лайкь хьуну ур Да­гъусттан Республикалул БакIчи Рамазан АьбдуллатIиповлул цIакусса ссятран, личIи-личIисса ХIурматрал грамотарттан ва медальлан. Мансур Адамович хIакьинусса кьинигу бусравну ур архIал зузиминнан. Цала даврил хIал кIулсса, лавай­сса даражалул пишакар хIисаврай кIибачIлай ур даврил опыт жагьилминнащал. Буниялагу укун ххаллилсса пишакартурайри дарцIуну дусса жула авиациягу. Дагъусттаннал авиациялуву зий Мансур Адамовичлул хьуну дур 57-нния лирчусса шинну.
Пишалул ларайсса профессионализм дусса, дакIнийхтуну ва хьхьичIунну зузисса пишакар хIисаврай, Мансур Адамович 2010 шинал увчIуну ур «Дагъусттаннал Авиалинияртту» ОАО-лул авиаработниктурал профсоюзирттал председательну. ХIакьинусса кьинигу цайнма вихшала бувсса ва къуллугърайгу Мансур Адамович зий ур дакIнийхтуну ва архIал зузиминнан бусрав хьунну. Кьилвалул Аьрасатнал авиаработниктурал профсоюзрал комитетрал чулуха 2011 шинал ва увчIуну ур Москавлив хьусса авиаработниктурал профсоюзирттал lV-мур съездрайнсса делегатну.
Февраль зурул 3-нний кIицI лагантIисса Дагъусттаннал авиапредприятиялул 90 шинал юбилейрайнсса хIадуршиннардахагу хъунмурчIин зий бур Мансур Адамовичлул каялувшиндаралусса авиаработниктурал профсоюзирттал комитет.
Мансур Адамовичлул бувсунни авиапредприятиялул юбилейрал хьунийн хIадур дуллай бушиву хьхьичIунну зузисса пишакартурансса ХIурматрал грамотартту, медаллу, цIакусса ссятру ва цаймигу бахшишру.
— Авиапредприятиялул юбилейран хасну хIукмурду бувну буссар хьхьичIунну зузисса пишакартуран Аьрасатнал Федерациялул чулуха­сса ларайсса цIарду дулунсса ва арцуйнусса бахшишру дулунсса.
Мяйжаннугу махъсса шиннардий аэропортрал даву хъинну чялишну ва лавайсса даражалий дуллай бур. Агьамсса давурттив дунни аэропорт цIубуккан баву мурадрай. КутIасса чIумул мутталий аэропортрай дунни хъунисса да­хханашивуртту, гьануцIакул баххана хьунни ва цIубуккан бунни республикалул аэропорт. Утти жула аэропортгу дунияллул даражалул лагрулийсса аэропортирдал даражалийн бивссар. ХIакьинусса кьини аэропортрай цал архIал кьамул дуллай буссар цикссагу авиакомпаниярттал самолетру. Му бакъассагу, утти аэропортрай байбивхьуну бур дунияллул халкьуннал даражалий­сса терминал буллай. Ва терминалгу бувну къуртал бан най бур 2017 шинал гъинтнил ахирданийнин.
АэропортрачIан биявайсса кIанттай самолет дацIан дурсса комплексрачIа бувну къуртал бавай буссар Авиациялул архиврал музей. Вагу жула авиациялул тарих ябаву мурадрай дуллалисса агьам­сса давур.
2015 шинал Ухссавнил Ккавкказуллал федерал округрайсса аэропортирдал даврил хIасиллу ххал дигьлагьисса давриву кIилчинсса кIану бувгьуссар АхIмадхан Султаннул цIанийсса МахIачкъалаллал аэропортрал. ЦIана аэропортрал каялувчитурал ва профсоюзрал комитетрал зузалтращал архIал кьутIи дурну дуссар юбилейран хасну цинявппа зузалтран премияртту дулунсса. Аэропортрайсса цинявппа зузалт щаллу байссар цала-цала пишалун хасъсса тIалавшиннарду ду­сса хасъсса лаххиярттал. Мукунма цинявппа зузалтрал лахьхьайссар цала-цала даврин аьркинсса сертификатрал тIалавшиннарду биттур дуллалисса курсру ва ученияртту.
Профсоюзрал комитетрал хъуннасса жяматийсса даву дуллай бур жагьилсса пишакартал тарбия баву ва миннан куртIсса кIулшивуртту дулаву мурадрай. Комитетрал вакилтал личIи-личIисса байраннай (Космонавтикалул кьини, Ххувшаврил байрандалий ва цаймигу шадлугъирттай) хьунабакьайссар МахIачкъалаллал, Каспийскаллал школардал дуклаки оьрчIащал.
Чансса дакъар профсоюзрал комитетрал жула зузалтран кумаг хIисаврай дуллалисса давуртту. ХьхьичIва-хьхьичI жу, зузалтрал цIуллу-сагъшиву дуруччаву мурад­рай, кьутIирду дарду «Талги» санаториялийнсса путевкардал 50% багьлул профсоюзрал комитетрал чулуха буллан. Му бакъассагу, жу жула зузалтрал оьрчIан бахшишран хIадур барду ЦIусса шинал елкалул байрандалийнсса 100 билет ва оьрчIансса ссайгъатру, — тIий буслай ур Мансур Кимпаев.
Граждан авиациялул циняв­ппагу зузалтрахь байран барча тIий, чIа тIий буру цIуллушиву, давриву тIайлабацIуртту.