Октябрьданул 31-нний ДР-лул паччахIлугърал хъунмур санитарный хIакин Элеонора Оьмариевал ва Аьрасатнал ххюттуканил лахъай азардал мониторинграл референс-центрданул каялувчи Александр Подколзиннул цачIу бунни журналистътурансса брифинг. Ми журналистътуращал хьунабакьаврил савав хьуссар МахIачкъалаллал чIявусса инсантал ххюттуканил азардал къашавай шаву.
ХIасан Аьдилов
Брифинграй Э. Оьмариевал бувсъсса куццуй, чIявуми къашавай хьусса инсантал букIлан бивкIссар республикалул лахъай азардал центрданийн октябрьданул 27-нний 22 ссятраву оьрчIал садикирттаву, яслирдаву оьрчIру архIал къашавай хьусса ишру хьуну бакъар.
Къашавай хьуминнал лабораториялул анализру дурну кIул бувну бур циняв къашавай хьуминнава 47% бушиву дизентериялул къашавай хьусса, 24% кьацIливух багьсса вирусрал азардал къашавайсса (ротовирусная инфекция), ливчIминнай дусса дур вирусрал ва бактериярттал сукку дурсса азарду. Мукунма кIул хьуну бур азарду сукку хьуну душиву щара лахъан къадурсса щин хIачIаврийну.
Эпидемиялул тагьар зия шаврин кумагну хьуссар чIярусса гъараллу лачIаву, миннул кучардавусса чапалшивуртту хIала дурссар хIачIайсса щинавун.
Э. Оьмариевал бувсунни эпидемиялул тагьар ххуй дан дуллалисса давурттаятугу. Миннувасса ца хъанай дур А вирусрал гепатитрайн къаршисса вакцинартту баву МахIачкъалаллал цаппара кIанттурдай ялапар хъанахъиминнайн.
«Махачкалаводоканал» ОАО-райн тапшур бувну бур щинахьхьун лавгун бивкIсса кIанттурдайсса щинаххуллурду (водопроводру) шюгу шювшуну, дезинфекциягу дуван. Гужлан бувну бур МахIачкъала шагьрулийн итадакьайсса щинал ялувсса контроль. ХIукму кьамул бувну бур МахIачкъалаллал поселокирттайсса оьрчIал садикру лакьин цаппара хIаллайсса. ДР-лул паччахIлугърал хъунмур санитарный хIакиннал хIукму бувну бур МахIачкъалаллал Щамххал, Щамхал-Термен, Красноармейск, Семендер поселокирттавун нани_сса щин лакьин ва миккун хIачIайсса щин ххилан. Муниципал сакиншиндалийн тапшур бувну бур кучардаву дахху-ласуртту къадуллан, агьали ялапар хъанахъисса кIанттурду марцI буккан буллан.
КОР-данул дирекциялийн тапшур бувну бур 3 кьинилул дянив каналданувун чапалсса щинну дагьан къадитан. ДР-лул Силистталул комитетрайн гьан дурну дур материал агьалинал цIуллушивруйн зарал биян баврил хIакъираву.
Журналистътурал суалданухьхьун жаваб дуллай, Э. Оьмариевал бувсунни хIачIайсса щин чапал шаврил ва инсантал къашавай шаврил дянив тIайланнасса дахIаву душиву.
Александр Подколизиннул кутIану бувсунни ва тагьар ххуй давриву референс-центрданул зузалтрал дуллалисса давурттаяту. Ганал мукъурттийн бувну, миннал хъиривлаявуртту дуллай бур шиккугу, яла Москавлив эпидемиологиялул центральный НИИ-райгу. ЧIявуми къашайшалтрай ляркъуну дур Зоннел дизентерия. Мунил хьхьичIалу кьукьинсса чараннугу ляхълай бур.
