Октябрь зурул ахирданий МахIачкъалалив хьхьичIра-хьхьичI хьунни чани бакъаминнансса кинорал фестиваль. Ванил сиптачиталгу бия ПАО Сбербанкрал Дагъусттанналмур отделение, Аьра­сатнал чани бакъаминнал идаралул (ВОС) республикалул организациялущал уртакьну.

ХIакьинусса кьини Дагъус­ттаннай усса ур 20 азара инсан чани бакъасса, миннан, гьай-гьай, укунмасса, жува циняв лагайсса кинотеатрдания пайда бакъар. Амма тифлокомментариярду дусса кинорду ххал дуваврийну миннаща бюхълай бур кинорал дунияллийн буккан. Республикалий цалчинни чани бакъаминнансса кинорал фестиваль дуллалиссагу. «Гьашину Сбербанкран 175 шин хъанай дунавхьур, «175 ххуйсса даву» тIисса проект бартдигьинтIиссар Сбербанкрал, ва проектрал лаг­рулийри чани бакъаминнан­сса акциягу дуллалисса. Сбербанкрал цила давриву мудангу къулагъас дуллалиссар цIуллу-сагъшиврул нукьсансса инсантурал мурадругу хIисавравун лавсун. Миннансса къулайшиннарду дузал дуваврих. Вана утти­гъанну кунма ВОС-ращал уртакьну чани бакъасса ягу чани чан­сса инсантураща банкоматирттая арцу ласун шай­сса технология дурссар. Мукунма хIукму бувссар цIусса банкоматру дузал буван чани бакъаминнан кумагрансса аудиовыходрал», — тIий бур Дагъусттаннал отделениялул управляющийнал хъиривчу Загьирова Гульжан.
ВОС-рал Дагъустанналмур организациялул председатель ХавлатIип НазирхIажиевлул бувсунни укунсса акциярду чанная махIрумсса инсантуран тирхханнарал лахIзарду хъанахъишиву, кинематографрал дунияллийн буккан бюхъаврия мурчIисса инсантал рязийну бушиву. Фильмру ккаккан дуван тIий бур МахIачкъалаллал чани бакъаминнансса интернатраву ва Буйнакск шагьрулул ВОС-рал кIанттул ккурандалуву. Ва акция най бур «КIяласса аьсав» тIисса зурул мутталий, октябрь зурул 15-нний байбивхьуссар чани бакъаминнал къайгъурдалсса буллансса мурадрайсса му барз, ноябрь зурул 13-нний тIурчарив щаллагу дунияллий кIицI лагайссар чани бакъаминнал кьини хIисаврай.