Октябрьданул 4-нний Дагъусттаннай хьунни акция «Ночь искусств». Мунил лагрулий хьусса мероприятиярттайн бувкIунни биялсса инсантал. Гьашинусса шин Кинорал шингу душиву хIисавравун лавсун, ва ххуллухмур «Ночь искусств» акциялул чIяруми давуртту хас дурну дия му иширан ва ноябрьданул 4-нний кIицI лагайсса Халкьуннал цашиврул кьинилун.

Бадрижамал Аьлиева
Акциялул лагрулий дуллалисса мероприятиярттавух гьуртту хьунни ДР-лул культуралул министр Зарема Буттаевагу. Ванил бусаврийн бувну, гьашинумур акция хьуну дур «Время создавать» мукъурттийну­сса оьвчаврилу.
Му хьхьунусса мероприятияр­ттайн тамашачитал кьамул буван республикалул культуралул идарар­ттал цала нузкьунттив тIиртIуна ах­ттакьуннай ссят 18.00 хьуну махъ ва хьхьудяризаннин. Акциялувух гьуртту хьуми бивунни республикалул хъун шагьрулул музейрдавун, биб­лиотекарттавун, театрдавун, хьунабавкьунни чичултращал, художниктуращал, актертуращал.
П.С. ХIамзатовал цIанийсса Дагъусттаннал изобразительный искусствардал музейравуми мероприятияртту най дия хьхьунил ссят 12 хьуннин. Му чIумуй шикку хьунни экскурсиярду ва личIи-личIисса хьунабакьавуртту. Ккаккан дунни режиссер Арслан Мурзабековлул кутIасса фильм «Кизяк – добро. Кизяк – тепло» цIанилусса. Ва хьхьуну тамашачитал хьунабавкьунни авторнащал цащалвагу.
Республикалул Шеърилугърал театрданувун бавтIун бия жагьил­сса шаэртурал «Лира» клубравун бухлахими ва миннащал хьунабакьин бувкIми. Мукунна ва хьхьуну шикку хьунни художник Мурад Халиловлущалсса хьунабакьавугу. ТIиртIуну дия оьрчIал дирхьусса суратирттал ихIсандалул выставкагу.
А. Тахо-Годил цIанийсса Дагъус­ттаннал паччахIлугърал цачIун був­сса тарихрал ва архитектуралул музейрал ва Т. Мурадовлул цIанийсса Дагъусттаннал паччахIлугърал филармониялул цачIу хIадур бувну бия проект «О чем молчат атланты» цIанилусса. Хьунни экскурсия-путешествие «Тайны старого дома» тIисса цIанилусса. Акциялувух гьуртту хьуминнаща ккаккан бювхъунни вайми кьинирдай шивун бувкIминнал итталун къадагьаймур. Дагъусттаннал паччахIлугърал филармониялул камерный квартетрал щаллу бунни ХIХ аьсрулул ахирданул, ХХ аьсрулул дайдихьулул музыка.
В. В. Макаровал цIанийсса Боевой славалул музейралгу (А. Тахо-Годил цIанийсса Дагъусттаннал паччахIлугърал цачIун був музейрал филиал) хIадур дурну дия хасъсса программа. Шиву хьунни Да­гъусттаннал халкьуннал шаэр, ДР-лул ПаччахIлугърал премиялул лауреат, ДР-лул культуралул лайкь хьусса зузала Космина Исрапиловащалсса хьунабакьаву. Мукунна хIадур дурну дия «Музейная хроника» цIанилусса выставкагу.
Р. ХIамзатовлул цIанийсса Миллатрал библиотекалуву хьунни «Искусство Дагестана» цIанилусса выставка ва «Верба» цIанилусса литературалул клубрал гьурттучитуращалсса хьунабакьавуртту.
«Дагестанский аул» музейравун бувкIминнаща бювхъунни вичIи дишин Халкьуннал инструментирттал музыкалул оркестрданул щаллу буллалисса миллатрал музыкалух.
ДР-лул Художниктурал союзрал Выставкардал залдануву хьунни Аьрасатнал лайкь хьусса художник Зуркьарнай Рабадановлущалсса ва Аьрасатнал халкьуннал художник ХIамзат ГъазимахIаммадовлущалсса хьунабакьавуртту.
Акциялул давривух гьуртту хьунни Дарбант шагьругу. Дарбантуллал паччахIлугърал тарихрал-архитектуралул ва художествалул музей-заповедникраву ккаккан дунни фильмру «Огни большого города» ва «Тайна рукописного корана».
Дунияллул культурардал ва диннал тарихрал музейравугу хьунни ва акциялул лагрулийсса хьунабакьавуртту.