Ларгсса бигьалагай кьини, ноябрьданул 13-нний МахIачкъалалив Дусшиврул къатлуву «Лак дакьаврихлу ва цашиврухлу» тIисса республикалул даражалийсса цалчинсса форум хьунни. Форум сакин бувну бия «Лакрал жагьилтурал сакиншинна» ДРОО-лул.
Ва сакиншиндарал дайдихьугу хьуну дур ттинин республикалий чIярусса рахIму-цIимилул, чирилул давуртту дурсса «Инсан» фондрая.

Залму АьбдурахIманова
Дахьра ца шинай щурущисса жула лакрал жагьилтурал сакиншиндарал уттинин дурсса чирилул давурттал тасттикь буллай бур циксса масъалартту, мурадру бартбигьлай буссарив вайннал. Шинал мутталий ва сакиншиндарал дурну дур 20-ксса мероприятие, агьамшиврух ва лагрулух бурувгун. Фондрал давурттал ва буллалисса кумаграл хъунмурчIинсса мяъна-мурадгу социал журалулсса бур. Ванивух гьурттуну бур жула миллатрал яла язисса, дакIру тIиртIусса, аьркиннан цащава бан шайсса кумаг бан анавар бувксса арсру, душру. Ва шинал дяниву вай жагьилтурал хIарачатрацIух був­сса кумагру бивну бур жула шаннагу райондалийсса чIявусса оьрчIру бусса, ятинтал хъуни буллалисса кулпатирттачIан, захIматсса азаруннил бувгьуминначIан ва цаймигу буруккинну буминначIан. Ца жула лакрал районнай дакъа, «Лак­рал жагьилтурал сакиншинна» ДРОО-лул сипталу Дагъусттаннал районнай най диркIссар «Ятинтурансса ххаришиву» тIисса акция. Му акциялул ахирданий ва ларгсса гъинттул МахIачкъалаливсса паркраву вайннал сакин дурну дур циняр районная бучIан бувсса 600-ксса ятин­сса оьрчIансса хъуннасса тя­хъасса шадлугъ. Утти ва вайннал сипталий хьусса акция цачIа-цачIарагу дан хIадур хъанай, эстафета ларсун дур Къиримнавусса ва Чачаннал рес­публикалийсса фондиртталгу.
Бигьалагай кьинилух къабурувгун, цала-цала масъаларттугу махънийн бивтун, ва кьини жула чантI кусса, дакIурдиву цIими ххисса жагьилтурал дачин дурсса даврищал кIул хьун шиккун бавтIун бия мадарасса халкьгу. Бия вайннавух чIявучин бусравсса учительтал, Лак­рал театрданул пишакартал, шаннагу райондалул щархъал вакилтал, цIа дурксса спортсментал, личIи-личIисса жяматийсса ишккаккулт, Дагъусттаннал муфтиятрал вакилтал, вузирдал студентътал ва укунмасса халкь.
Форумгу байбивхьуна жула миллатрал тарихрая, багьу-бизулия, ниттил мазрая, жула культуралия, Ватан ххирану жула ялун нанисса ник тарбия дан аьркиншиврия бусласисса хъун дакъасса видеоролик ккаккан даврия. СахIналия форум бачин бувну ия Москавливсса Да­гъусттаннал вакилханалийсса комиссиялул председатель МахIаммад Ажуев. ЧIявуя фонд ххуйсса, барачатсса дайдишаврищал барча бан ва дуллалисса давриву тIайлабацIу чIа учин бувкIмигу. ДР-лул Жагьилтурал иширттаха зузисса министерствалийсса пропагандалул отделданул хъунама Минкаил Минкаиловлул кIицI бувунни, лакрал жагьилтурал сакиншиндарал сипталий дур­сса цаппара акциярду тикрал дуршиву вайми-вайми миллатирттал жагьилтурал сакиншиннардилгу. Бувсунни вай чирилул давурттал жула халкь цачIун буллалишиву, цаннал ца дард-хажалат духIансса гуж, каши ххи дуллалишиву.
— Дахьва ца шинай щурущи­сса ва сакиншиндарал дурунни хъинну мюнпатсса, ялун наниминнангу эбрат­рансса давурттив. Сакиншиндарал давуртту рувхIанийссаннуяргу, социал­сса бутIа ххисса давурттур. Вайннал давурттал тематика гьарза-гьартасса дур, спортрал мероприятиярттая тIайла хьуну, ялунсса кIулшивуртту ххи дуллалиминнуйн бияннин. ЧIа тIий ура гихунмайгу ва цала язи бувгьусса бущилий, халкьуннан мюнпатсса давурттаха зун­сса каши-кьудрат. Жугу жула чулуха хIадурссару гьар вайннал дан дакIнийсса давурттавух жущава шайссаксса гьуртту хьун, чIарав бацIан. Тавакъю бан ччива ши­ккун бавтIсса гьарнахь – тарбия буллалира укунсса жагьилтал эбрат­ран буцлай. Цумур-цагу жяматраву чирилул давуртту дан чяш бувксса жагьилтал гьарза хьурча, мукунсса жямат бахтти бусса, ялун бучIантIимур цIакьсса жяматран ккалли бан бучIиссар.
ДР-лул ХIукуматрачIасса Диндалул идарарттащал зузисса комитетрал консультант Давуд Тумалаевлулгу сакиншиндарал хъиндайдихьулущал барчагу бувну, бувсунни хIукуматрал чулухагу хъунна­сса къулагъас ва чIарахбацIаву душиву фондран ва гихунмайгу цив хIадуршиву хIала-гьурттуну цащава шаймунил кумаг буван.
— Лакрал жагьилтурал сакиншинна зий дахьра шин хьуну дур. Шинал мутталий чIярусса хъиншивуртту, чIярусса давурттугу дурну дур. Цалчинма-цалчин укунсса мероприятиярттал чIалачIи бай­ссар хъирив нанисса никиранссагу ххуллу. Жула жагьилтурал дуллалисса давурттал ххуллугу жунма чIалай бур тIайласса, хIакьсса ххуллу бушиву. Жулла обществалуву­сса цимурца буруккинну жагьилтурайнгу асар къавхьуну, щатIи къавщуну чIарах буклай бакъар. Цавай щатIал лавсун, бявкьу ххуллийх лаглай бур, цавайгу ххуллурдал шанбачIулий личIлай бур. Миннан кумагран, эбратран вай жагьилтурал дуллалисса давуртту хьун аьркинссар. Мунивур жула жува бала-апатIирттая мурахас бавугу дусса. Ва форумгу ва фондрал мурадир­ттая бусласисса, вайннал умудир­ттайн вихшала дишин буллали­сса давур. ТIайлабацIу хьуннав зун дуллалимуниву! — увкунни Давуд Тумалаевлул.
Барча бавурттацIун ва чIа учавурттацIун форумрал даврий мукунма хьунни ххуйсса ва хъинну мяъналул куртIсса, жагьилтуран хайрсса ихтилатругу. Москавлия жулла республикалийн хъамалу бувкIсса, интернетравусса мюхчаншиврул эксперт Наталья Захаровал бувсунни махъсса шиннардий цуппа зузисса мюхчаншиврул аралуву хьунадакьлакьисса захIматшивурттая, жагьилтал аьркин бакъасса ишир­ттавун кIункIу буллалисса обществалул цIуцIи кIанттурдая ва канища жула оьрчIру интернет сававну иткъаххяхханшиврул къулагъас дан­сса кIанттурдая.
Мукунма ялун нанисса никирал тарбиялух хъуннасса къулагъас дан аьркиншивриясса, оьрчIру диндалул, хIакьмунил, марцIмунил ххуллий тарбия буллан аьркиншивриясса итхтилатру бувунни ДР-лул Муфтиятрал вакил МахIаммад-Расул МахIадовлул, ДР-лул спортрал министрнал хъиривчу ХIайдарбаг ХIайдарбаговлул, жула цIадурксса спортсмен Рамазан Рамазановлул ва цайминнал.
Форумрай мукуна дакIнийн увтунни Дагъусттаннай диндалул гьанурду цIакь шавриву хъунма­сса бутIа кьабивтсса ва цувагу 2008 шинал оьсса къачагътурал канища ивкIусса диндалул журналист Аьбдулла Аьлишаевгу. Шикку ккаккан дурунни ванаясса хъун дакъасса видеоролик.
Фондрал гьурттучитурал цала чулуха шиккун бувкIсса ва цала чIарав бацIан хIадурсса инсантуран Барчаллагьрал чагъарду ва личIи-личIийсса дакIний личIансса бахшишру дунни. Укунминнавух бия МахIачкъалаллал №36-мур школалий лакку мазрал дарсру дихьлахьисса, гьашинусса республикалул конкурсрай ххув хьуну, «Ниттил мазрал яла хьхьичIунма учитель» цIанин лайкь хьусса Джума Оьмалалиевагу.
Мукунна шикку бахшишру дунни уттигъанну жулла шаннагу райондалий, «Благонравие праведников» тIисса луттирава кIул хьумунил хъирив дурсса конкурсраву ххув хьуминнангу. Конкурс цIубакIрай дурну диркIссар районнай, хъирив микку ххув хьуминнал дянив­сса конкурс хьуссар ноябрьданул 12-нний. Форумрай ва конкурсраву ххув хьуну, 1-мур кIанттун лайкь хьусса Ххюлусматусса РайхIанат Майранован пишкаш бувунни «Лада-Приора», 2-мур кIану бувгьусса Кьубатусса Жавраил Жамалуттиновлун 100 азарда къуруш арцул ва 3-мур кIанттун лайкь хьусса Хъунатусса Фатима ХIасанбагован 80 азарда къуруш.
Форумрал даву жула цIанихсса къавтIавурттайну ва хIакьсса ла­кку макьаннайсса балайрдайну чIюлу дан, ванивух гьурттуну бия къавтIавурттал ансамбль «Молодость Дагестана», ДР-лул халкьуннал артистка Саният Рамазанова ва ДР-лул лайкь хьусса артист ХIажиаьли ХIажиаьлиев. Ниттиха­сса ва Лакку билаятрахасса балайрду сахIналий щаллу бувунни мукунма жунма чIявучин бусравсса балайчитал Самед Буттаевлул, Рашид Багатаевлул ва Ислам Рамазановлул.
Цалчин, мухлукьгу бавтIун, дуллалисса лакрал жагьилтурал сакиншиндаран гихуннайгу дуллансса давурттаву тIайлабацIу чIа тIий, умуд бишин ччай бур вайннал кьюкьри ваниярдагу гьарта-гьарза хьуншиврийн, вайннал дуллалимунил чIарах букканми чан хьуншиврийн ва гьарнал бувсса хъинбаларду Хъунасса ЗанначIа чирину лякъинтIишиврийн.