ОГИБДД-лул зузалтрал вай гьантрай дурсса рейд дия хIакьину жува хьунабакьлакьисса агьамсса масъалалуцIун дархIусса – хасъсса транспортрал хIакъиравусса, цинявппагу шофертуран мугьлат бакъа нанисса хасъсса транспорт хьхьичI итадакьин аьркиншиву бувчIин буллалисса.
Цинявппагу экстренный службардал оьвкунийн анаварну нанисса чIумал лахъай сиренарду ва чирахъру. Мунийну чIалачIиссар ми машинарттан ххуллу тIитIин, ми хьхьичI итабакьин багьлагьишиву. Амма шофертал анавар буклай бакъар мукунсса машинарттан ххуллу булун. Му чIумал хасъсса транспортрал шофертуран, цала кумаг аьркинсса кIанайн чIумуй бияншиврул, хьунив ххуллийн буккан, ягу ятIулсса светофорданий бачин багьай. Къаша-шавай хьусса, цIунцIия хьусса инсанначIан цуксса ччяни биврив анаварсса кумаг, муксса хъуннассар мунал оьрму ххассал бансса вихшала.
Инсаннал оьрму ххассал бан нанисса хасъсса машинарттан ххуллу къабулайссар так адав-инсап дакъасса шофертурал. «Анаварсса кумаграл» шагьрулул станциялул оператив даврил хIакин Нариман Рамазановлул бусласимунийн бувну, «Анаварсса кумаграл» машинарттан шофертурал ххуллу буллай бакъар, му масъалалул тагьаргу шиная шинайн захIмат хъанай дур. ЧIявучин мукун ххуллу итакъабакьлакьими бур маршруткардал ва таксирдал шофертал. ДПС-лул ОБ-лул командирнал хъиривчу Мурад Бабаевлул буслай ур ва цIанасса рейдгу Анаварсса медициналул кумаграл больницалул чулухасса, шагьрулул ххуллурдай цала машинартту хьхьичI итабакьлай бакъар тIисса аьрзирдайн бувну дуллалишиву. Ванил мурадгу бур шофертурахь анаварсса кумаг бан нанисса хасъсса транспортран ххуллу тIитIин аьркиншиву бусласисса.
Ми хьхьичI итакъабакьирчан, зарал бивманан бантIисса кумаггу чIал хьун най бур. Ва рейдрай «Анаварсса кумагращал» архIал най бия ГИБДД-лул патрульгу. Сиренарду ва маякру лархъсса машинарттан ххуллу къабуллуми бацIан буллай бия ДПС-лул нарядрал.
Мурад Бабаевлул бувсунни АьФ-лул КоАП-рал 12.17. статьялийн бувну хасъсса схемарду ва лишанну дусса, някIсса рангирал чирахъру лавхъсса ва сигналлу дуллалисса машинартту хьхьичI итакъабавкьусса шофертурай 500 къуруш аькIлул дишайшиву, ягу ца зуруя шанма зуруйн бияннин машина бачин бансса ихтияр зеххайшиву. Ва рейдрал лагрулий ГИББД-лул зузалтрал цаппарасса шофертурал хIакъираву бунни протоколлу, цаппарассаннай дюъ дирхьунни.
