«Зузияра, уссурвал!» акция щалагу билаятрай

r39_13МахIачкъалалив

Сентябрь зурул 27-нний ссят 15.00 хьусса чIумал МахIачкъалалив ДР-лул Виваллил иширттал министерствалул къатрал хьхьичI дайдирхьунни Аьрасатнал Виричу МахIаммад НурбахIандовлул аьпалунсса «Работайте, братья» тIисса акциялул 2-мур этап.
Акциялул цалчинмур этап хьуссия сентябрь зурул 17-нний. Му акция хъинчулий ккаклакисса ихтилатру чIявусса хьунни социал сетирдавугу. Мукун­сса акциярду дан тIий бур Калининград, Ростов-на-Дону, Пятигорск, Москва, Санкт-Петербург шагьрурдай, мукунма Кабардин-Балкарнаву, Ингушетиянаву, Чачаннаву.
«Работайте, братья!» акциялул сакиншинначиталну був­ккунни ДР-лул Печатьрал ва информациялул министерствалул информационно-культурный центр. Миннал дуллалимунил чIарав бавцIунни «Открытые сердца» тIисса цачIушинна ва «Дагестан против» тIисса сообщество. Акциялуву хъуннасса гьурттушинна дунни ДР-лул МВД-лул зузалтралгу.
img_9518_d12-800x600«Работайте, братья» тIий чивчусса кIяласса футболкардавусса 100-нния ливчусса волонтертал, кадетътал ва МВД-лул зузалт най бия Р. ХIамзатовлул цIанийсса кучалийх шагьрулул агьалинахь МахIаммад НурбахIандовлуя, мунал дурсса къучагъшиврия буслай, дачIлай бия мийва тарихравун багьсса «Работайте, братья!» тIисса махъру чивчусса стикерду. Ва кьини волонтертурал дарчIунни МахIачкъалаллал агьалинайх 2 азаруннийн дирсса стикерду.
Заллухърунная рязишинна ларсун, стикерду лачIун дуллай бия машинарттай ва къатрал чIирттай.
Информационно-культур­ный центрданул Координационный советрал хъунаманал хъиривчу МахIаммад Кьурбановлул бусласимунийн бувну, акциялул кIилчинсса этап бан пикри хьуну бур Ухссавнил Ккавкказуллал ва Аьрасатнал чIярусса регионнай акциялул чул бувгьусса, ванивух хIала хьун ччисса чIявусса инсантал бувккун тIий.
— Акциялул сакиншинначитурайн ва давривух гьуртту хьун ччишиву баян бунни Калининград, Ростов-на-Дону, Пятигорск, Москва, Санкт-Петербург шагьрурдая, Кабардин-Балкарнава, Ингушетиянава, Чачаннава. Миннал гьан дунни 3 азаруннийн дир­сса наклейкарду. Му бакъассагу, жун пикри хьунни Работайте братья. РФ. сайт дурну, микку дишин графический лишанну, ччиманал цанна стикер распечатать даншиврул, — тIий ур МахIаммад Кьурбанов.
— Ва даврил сиптачитурал чIарав бавцIуну, жугу гъирарай гьуртту хьуру ва акциялуву. Ва хъинну агьамсса давур. Ванил мурад бур терроризмалущал­сса талатавриву жагьилтал цачIу бушиву ккаккан баву, бивкIулул хьхьичI нигьакъаувсъсса, цала къуллугърайн хаин къавхьусса виричуная гьарица инсаннахь бусаву. ЦIана «Работайте, братья!» тIисса акция щалагу Аьрасатнаву най дур.
Акция ларгунни Сургутлив, Нижневартовскалий, Нефтеюганскалий, Сыктывкардай ва цаймигу Аьрасатнал регионнай — буслай бур «Открытые сердца» тIисса хушрайсса цачIушиндарал каялувчи Заина Арсанбиева. ДР-лул МВД-лул пресс-службалул хъунмур Фатина Убайдатовал кIицI лавгунни ва акциялувух гьуртту шаврийну Министерствалул вакилтурал тасттикь бувшиву царагу виричушиву хъамакъаритантIишиву.
— Жула зузала МахIаммад НурбахIандовлул дурсса ца виричушиврия бакъар ихтилат. Ва акциялийну жу дакIнийн бичарду жандалий хIайп къаувкуну Ватан дуручлай, къуллугърал бурж бартбивгьусса цинявппагу жула зузалт, — увкунни Фатина Убайдатовал.

Краснодардай

Краснодар шагьрулул агьали ва полициялул зузалт хIала бувххунни «Работайте, братья!» акциялувух.
«Работайте, братья!» тIий чивчусса стикерду дачIлай бия крайрал Хъунмур управлениялул къатрал хьхьичI.
Ца ссятрал дянив шикку дарчIунни ттуршрахъул наклейкарду. Инсантал лачIлай бия ми цала машинарттай, ласлай бия цаннассагу, цайминнан дулун­ссагу. Къучагъшиврул эбратну хьусса полициялул лейтенант МахIаммад НурбахIандовлул хIурматран, ванал аьпалун акциялувух гьуртту хьун ва кьини шиккун бувкIми чIявусса бия. Укунсса стикерду дачIлан тIий бур Краснодардал крайрал цайми районнайгу.

Республика Коми

Коми Республикалул МВД «Смена» тIисса активистурал суккушиннаращал ва КIулшивуртту дулаврил министерствалущал гьуртту хьунни щалагу билаятрай нанисса «Работайте, братья!» акциялуву.
Гьарицагу аьрасатлувнаща бюхъайссар «Работайте, братья!» тIий чивчусса листовка распечатать дурну, тIайлабацIу чIа тIисса хъинсса мукъурттищал полициялул зузалахьхьун дулун.
Яла сурат рирщуну, му социальный сетирдаву дишин # укун­сса хэштегращал.
Коми Республикалий ва акциялувух хьхьичIва-хьхьичI хIала бувххунни Сыктывкардал дуклаки оьрчIру. Ми бувккунни шагьрулул кIичIирттавун республикалул агьалинан къучагъшиврий жан дуллусса полицейский дакIнийн утан. ТIайлабацIу чIа тIисса махъругу увкуну, дуклаки оьрчIал дуллунни стикерду полициялул зузалтрахьхьун. ЧIарах нанисса шагьрулул агьалинахь вай буслай бия Дагъусттаннал полицейскийл виричушиврия. Яла мийра стикердугу хьхьичI дургьуну, дуклаки оьрчIру бавцIунни рес­публикалул хъуншагьрулул универмаграл шачIанттай, «Работайте, братья!» тIисса, ца лахIзалий щалагу Аьрасатнавух ппив хьу­сса махъругу тIий.

Сургутлив

Сургутлив, шагьрулул сквердануву, интернационалистурансса гьайкалданучIагу ларгунни «Работайте, братья!» тIисса акция. Акциялул мурад бия региондалул агьалинан паракьатсса оьрмулувугу виричушиврун кIану бушиву бувчIин баву.
Акциялуву гьуртту хьунни жяматийсса организациярдал ва ихтиярду дуруччай органнал вакилтал. Гьар кIанай кунна, шиккугу дачIлай бия «Работайте, братья!» тIий чивчусса стикерду. Терроризмалущал талатисса полициялул зузалтран аманатну хьусса вай махъру бакъассагу, стикердай чирчуну дур Виричунал цIагу, бивхьуну бур Мусил ЦIукугу.
А. Аьбдуллаева