МахIачкъалаллал футболданул команда «Анжи» гьашинусса Аьрасатнал футболданул чемпионатрай ххув хьунни Тулаллал «Арсеналдануяр» 1:0 счетрайну. ТIуркIу хьуссар августрал 14-нний Каспийскалий «Анжи-Арена» стадиондалий. Ва дур цалчинсса ххувшаву жулла командалул ва чемпионатрай.

Гьай-гьай, муттаэтурал командалуща бюхъайва 16-мур минутIраву хьхьичIун дуккангу, агарда миннаща бювхъуну бивкIссания 11 метралия пенальти дузрайн буккан буван. Амма МахIачкъалаллал къапучи Александр Беленовлул къабивтуна тайннал полузащитник Кантемир Берхамовлул 11 метралия бивщусса ттуп жулва къапулувун буххан.
Дагъусттаннал командалул ца гол бавкьунни тIуркIулул цалчинмур бутIуй. Бернард Беришал цачIанма тIайла бувксса ттуп Иван Маевскийл запI бикIан бувуна муттаэтурал къапулувун.
ТIуркIулул 62-мур минутIраву Беришища бюхъанссия цащавагу бакьин гол, амма ганал тайннал къапулувун бивщуну гьан бувсса ттуп щуна къапулул ттурцIайн.
Ва тIуркIулия махъ «Анжилул» активраву бур 4 очко. Хъиривмур «Анжилул» тIуркIу хьунтIиссар Къазаннал «Рубиндалущал» августрал 19-нний.
«Анжи» (МахIачкъала) –
«Арсенал» (Тула) – 1:0.
Гол бавкьума: Маевский 45 (1:0).
«Анжи»: Беленов, ХIасанов, Лазич, ХIажибеков, Ямбере, Тигиев (ГъазимахIаммадов), Мусалов, Маевский, Бериша, Эбесилио (Боли), Будковский (Менса)
«Арсенал»: Герус, Денисов, Тесак, Горбатюк, Беляев, Форбе, Берхамов, Стеклов (Смирнов), Шешуков, Мухаметшин (Власов), Шевченко (Аппаев).
ХIадур бувссар
ХIасан Аьдиловлул