Вай гьантрай шагьрулул №50 школалул хIаятраву Лениннул райондалийсса школардайсса гъинтнил лагерьдайн заназисса оьрчIал дянивсса спартакиада хьунни. Ванил сакиншинна дурну дия шагьрулул Спортрал, туризмалул ва жагьилтурал иширттаха зузисса комитетрал ва КIулшивуртту дулаврил управлениялул цачIу.Укунсса журалул спортрал давуртту нантIиссар шагьрулул циняв школардайсса лагердай щалла гъинттул «Спорт в каждый двор» тIисса проектрал хахливу.
З. АьбдурахIманова
Спортрал шадлугъ тIитIлай, КIулшивуртту дулаврил управлениялул хъунама ТIагьир Мансуровлул, оьрчIругу барча бувну, кIицI лавгунни спортрая халкьуннал оьрмулун хъунмасса хайр биян буллалишиву, оьрчIнияцIава мунихун машхул хьун аьркиншиву.
Бяст-ччаллу бия оьрчIал командарттал дяниву ва цивппа-цивппалу гьурттуссагу. ОьрчIан 60 метралул манзилданийх, эстафеталий лечин багьлай бия, тIанкI учин багьлай бия лахъишиврий, кIункIу дан багьлай бия командарттал дяниву алхъан ва бия шашкарду ва дартс тIуркIу. Бяст-ччаллал ахирданий ТIагьир Мансуровлул ххув хьусса оьрчIан дуллунни грамотартту ва медаллу. Спортрал бяст-ччаллу бакъасса, оьрчIру тяхъа бан шиккун бувкIун бия оьрчIал къавтIавурттал ансамбль «Ссалам» ва дагъусттаннал эстрадалул балайчитал Аьйшат Айсаева ва Сабина Аьбдуллаева. Ахирданий оьрчIайх дарчIуна вайннан хъинну ххирасса мороженое.
